Huapzo sorkar a pian a ṭul - Tawnluia

MNF senior vice pre-sident Tawnluia, Tuichang biala MNF candidate chuan Inrinni khan Sialhawkah MNF campaign office a hawng a; mi tin huapzo, kohhran râwn nachâng hria, khawtlang mitmei veng thiam sorkar a pian a ṭul thu a sawi.

Tawnluia chuan, Congress NLUP chu a hlawhchham let dêr nia sawiin, "Party mi induhsak nan an hmang a, an sorkar pawh party sorkarah an chantir a, lal chhungkaw sorkar an din bawk. He sorkar hi paih a, mi tin huapzo sorkar, kohhran ràwn nachang hria, khawtlang mitmei veng thiam sorkar a pian a ṭul ta. Mipuite an thlamuan theih nan langtlang sorkar din turin MNF kan sorkar ngei a ngai a ni," a ti.

Itawm tak leh awhawm taka inzuar a, tih theih loh tur hmanga mipui bum tum mekte an awm nia sawiin Tawnluia chuan, "MNF chuan kan tih theih ngei tur leh kan sorkarin ram mipuite retheihna lak ata kan chhanchhuahna tur ngun takin kan hotute leh mithiamte ráwnin SEDP kan duang a ni," a ti a; kut hnathawktute thar chhuah hralhna kawngah a ṭul anga price support pek an tum thu a sawi.