KHAWTHLIR

Mizoramin electoral roll felfai tak a neih theih nan Special Summary Revision of Electoral Roll 2021 kalpui mekah ṭhahnemngai taka an huam chhung ṭheuha ṭan la turin Central YMA chuan YMA sub-headquarters, group leh branch-te a ngen. CYMA chuan, "Electoral roll-a lut tur ngeite an luh theih nan leh a lut lo turte an luh loh nana hma la ṭheuh turin CYMA chuan YMA sub-headquarters, group leh branch-te a hriattir e," a ti.

Damveng Branch KTP chuan an din champha vawi 19-na pualin nimin khan an kohhran hall-ah thisen pek rûnpui an huaihawt a; Civil Hospital, Aizawl tan thisen unit 34 an pe a, a petute mipa 27 leh hmeichhia pasarih an ni.

Aizawl district magistrate R Lalramnghaka chuan nimin khan thla hnih chhung atan thupek a chhuah. SIPMIU-in Tanhril Mualkhang rama NERCCDIP hnuaia Water Treatment Plant a din mek huam chhung chu restricted area-ah puan a ni a, sorkar thil ṭula duty emaw, SIPMIU-in phalna a pekte emaw ni lo tan luh khap a ni.

State Referral Hospital-ah nimin khan Covid-19 vei mi panga dah luh an ni a, anni nen mi 46 an awm mek. SRH-ZMC Bulletin tarlan danin, mi 46 zinga mi pathum chu ICU-ah enkawl an ni a, mi dang zawng Isolation ward-ah an awm. ICU-a enkawl zinga pakhat chu ventilator nen enkawl a ni a, pakhat dang chu oxygen pek mek a ni. Covid-19 vei, SRH-a enkawl mek zingah hian kum 60 chung lam mi 17 an tel.

Mizoram Remote Sensing Application Centre (MIRSAC) buatsaihin nimin khan Champhai IPR conference hall-ah Fostering Climate Resilient Upland Farming Systems In The North East (FOCUS) project kaltlanga Champhai district (undivided)-a thawktute pualin Geographic Information System (GIS) data zirhona buatsaih a ni a, Champhai DC Maria CT Zuali'n a kaihruai. FOCUS hnuaiah hian Champhai district-ah circle pariat a awm mek a ni.