Covid-19 MR bill 2,144 a lut tawh ; Mi 94 hnenah bill pek a ni tawh

Covid-19 vei zinga Mizoram State Health Care Society (MSHCS)-a inziak lutte'n an inenkawlna bakah, ei leh in atana an sensote an hmuh lêt theih tur thu May 19, 2021-a hriattirna tihchhuah a nih aṭanga January 31, 2022 thleng khan Covid-19 medical re-imbursement (MR) bill 2,144 a lut tawh a, chu'ng zinga mi 94 chu pek an ni tawh.

Directorate of Health Services (DHS) SPIO-in February 1, 2022-a RTI Act hmanga zawhna March 10, 2022-a chhànna a peka a lan danin, Covid-19 vei MSHCS-a inziak lutte'n an senso an bill theih hnuah January 31, 2022 thleng khan mi 2,144-in an inenkawlna senso bill an thehlut tawh a, bill amount belh khawm chu Rs 2,85,91,032 a ni.

MSHCS-a Covid-19 MR bill thehlut zinga mi 94 chu MSHCS aṭangin pawisa pek an ni tawh a, an pawisa hmuh chu a vaiin Rs 26,33,573 a ni.

Bill thehluttu mi 2,144 zinga 2,050 chuan pawisa an la hmu lo a; DHS SPIO chuan, bill la pek loh chhan zawhna chu, "Bill pek tur sum indaih loh vanga la pek loh an ni," tiin a chhang. January 31, 2022 thlenga sorkarin Covid-19 MR bill a la pek lohte hnena sum pek tur belh khawm chu Rs 2,59,57,459 a tling.

MSHCS principal chief executive officer Dr Chawngthanchhunga chuan May 19, 2021 khan hriattirna a tichhuak a, sorkar pawmpui damdawi-in, dedicated covid health centre (DCHC), covid care centre (CCC) leh community covid care centre (CCCC)-a Covid-19 vei enkawl, MSHCS-a inziak lutte'n an inenkawlna senso bakah, ei leh in man sorkar aṭangin an hmuh lêt (bill) theih dawn thu a tarlang.

Bill siamna tur claim form chu Covid-19 veite enkawlna hmunah dah a ni a, thil ṭulte dahkhah hnuah MSHCS pisaah thehluh tur a ni.