Lengpui Airport chei ṭhat chim chhan hmanraw hman ṭhat loh vangah ngai

All Mizoram Cement and Iron Rod Dealer's Association (AMCIRDA) chuan thuchhuah siamin, Lengpui Airport chei ṭhat mek March 10, 2022 tlaia chim ta chu hmanraw ṭha tawk lo hman vang nia an hriat thu an tarlang.

AMCIRDA chuan, Lengpui Airport chei ṭhat lai chim chu an hriat chian duh avangin March 13, Pathianni khan an hruaitute'n a hmunah an enfiah tih an tarlang a; Airport chei ṭhatnaah hian Quality Control of Cement and Iron Rod Committee hmalakna hmanga Mizo­ram sorkarin lak luh a phal loh mek leh BIS standard ni lo, iron rod len zawng (diameter) tling lo com­pany brand pathum - SMS Dur­gapur, Trishakti Durgapur, Zeecon Durgapur-te hman a ni tih an sawi.

"BIS Standard ni lo rod size (diameter) tling lo hman avang hian in structure chak zawng 30% dawn laia a tlakhniam theih avangin building structure lianah phei chuan hman a him lo lehzual a, chhiatrupna lian zawk thlen thei mangkháwng lianpui kan siam angah kan ngai," an ti a; cement erawh chu Mizorama cement ṭha ber pawl Dalmia hman a ni tih an tarlang.

AMCIRDA tarlan danin, iron rod len zawng (diameter) tehna digital caliper-in a hmuh dan chuan, Airport chei ṭhatnaa hman iron rod milimetre 20 turah mm. 17.8 - 18 a ni a; mm. 16 turah mm 14.8, mm. 10 turah mm. 8.8 leh mm. 8 turah mm. 7.8-te a ni bawk.

AMCIRDA chuan, "Hetianga ram ro tling tur vanduai thlak taka a chim ta mai hi pawi kan ti tak zet. Building chim aṭang hian BIS standard ni lo, rod size tling lo hman a him lohzia mipuite'n i hriat thar phah ang u," an ti.