Minister-in sorkar laipui hotute a kâwm

Minister Dr R Lalthangliana chuan nimin khan New Delhi-ah sorkar laipuia hotute a kâwm a; Ministry of Education hotute chuan, RUSA hnuaia thawkte hlawh tur chu Integrated Finance Division (IFD)-in an la tihfel theih loh avangin pek chhuah a la nih loh thu an lo hrilh niin sorkar thuchhuahin a tarlang.

Dr R Lalthangliana hian Ministry of Education additional secretary Vineet Joshi leh RUSA joint secretary Kamila Chauhan-te chu RUSA hnuaia zirtirtute hlawh la pek loh chungchang a sawipui bakah, Mizoram University Southern Campus din nan chak taka hma la turin a ngen. Sorkar laipui hotute chuan IFD-in an la tihfel theih loh avanga tihkhawtlai a nih thu te, RUSA-3 chu Central cabinet-in a pawm tawh thu leh kalpui chhunzawm a beiseiawm thute an lo hrilh a ni.

Minister chuan NITI Aayog member Vinod Paul hnenah Boeing company kaltlanga Civil Hospital, Aizawla dah tur MRI khawl ṭha chi chu a rang thei ang bera bun a nih theih nan hma lak sak turin a ngen a; Vinod Paul chuan theihtawp a chhuah tur a sawi.

Union Health secretary Dr Rajesh Bhushan hmuin Dr Thangtea chuan, NHM, Mizoram hnuaia thawkte hlawh leh hmalakna tura ruahman programme leh project hrang hranga sum pek chhuah muan chungchang leh PMES system chungchang a sawipui. ICMR hotute a kawm bawk a; March 2022 chhungin Mizoramah RT-PCR khawl pariat thawn hman an beisei thu an lo hrilh.