NHM, Mizoram hnuaia thawkte lungawi loin badge dum an bel

National Health Mission (NHM) hnuaia thawkte chuan Mizoram sorkara an phutte tihhlawhtlin a nih loh avanga lungawi loh lantir nan nimin aṭang khan hna an thawhna hmunah badge dum an bel ṭan a; a huhoa chawlh (mass casual leave) la turin an inpuahchah bawk.

NHM hnuaia thawkte inzawm khawmna pawl, NHM Employees Union, Mizoram (NEUM) hruaitute chuan, March 17, 2022 thleng badge dum bel an tum tih an tarlang a, "Sorkar laka kan demand hrang hrangah sorkar aṭanga thu lawmawm kan hmu lo a nih chuan March 21, 2022 aṭangin a ṭul a nih chuan mass casual leave lâk kan tum," an ti.

NEUM tarlan danin, nimin thleng khan nikum December thla hlawh aṭanga a hnu lam zawng hlawh an la tawh lo a, hlawh an lak hnuhnun ber chu November 2021 thla hlawh a ni.

An thil phût tihlawhtling tura sorkar kar nan December 17-19, 2021 chhung khan mass casual leave an lo la tawh a, December 20, 2021 zing dar 7-ah an titawp. Chawlh an lâk lai, December 19, 2021 tlai khan Mizoram sorkar chuan Health department hnuaia thawkte nawrh khapna thupek a tichhuak a ni.

NHM, Mizoram hnuaiah hian thawktu mi 2,200 vel an awm a; doctor, nurse, laboratory techni­cian, health worker, data entry operator, driver leh a dangte an tel.

NEUM LUNGAWI LOH CHHAN
!) NHM hnuaia thawkte state sorkara thun (regular/ absorb) an nih theihna tura sorkarin April 2021 aṭanga Study Group a din tawhte report tun thlenga hriat tur la awm lo.
2) Hlawh regular taka an lak theih tawh tur thu Health Minister-in a tiam chungin, November 2021 thla hlawh an lak bak a hnu lamah hlawh an la leh tawh lo.
3) NHM hnuaia thawkte hamṭhatna tur - Covid-19 veite a thlawna enkawl an nihna tura Health Secretary thu­chhuakin awmzia a nei lo angin a lang.
4) Medical reimbursement an lak ve theihna turah hmalakna a la awm lo.
5) Transfer TA chungchang hmalakna a la awm lo.