MNF sorkar hi damdawi mûm lian a ni - Lalruatkima

MNF adviser Lalruatkima, minister of state chuan, Mizoramin hun harsa a tawnte chu party dangin hmachhawn se, an buai hle tur thu sawiin, MNF sorkar chu damdawi mûm lian a nih thu a sawi.

Lalruatkima hian nimin khan Mizo Hnam Runa inkhawmah thu sawiin, Pathianin MNF sorkar a hruai a, a hruai zel dawn tih a sawi a, "Kan Pathianin min ensan ngai lo. Union Finance Minister-in bamboo link road leh Aizawl by-pass road atan chaw min lo fûn kêp a, Pu Hawla kha Central-in chaw an fûn kêp ngai lo," a ti.

MNF Adviser chuan, "Zu zawrh kan titawp a, sikul ṭan hun kan siamṭha a, district thar kan tipuitling. Sorkar hmasain kum 10 chhunga an tih theih loh sports policy chu kum khat chhungin kan tihlawhtling a, hripui karah kum 10 chhunga an phûl phah zat kan phah thei," a ti a; an manifesto tihlawhtling turin an bei char char tih a sawi.

Eptute'n sorkar an beihna sawiin Lalruatkima chuan, "SEDP sem thei lo, sem thuai thuai r'u, an ti a, sem kan han tum tak tak chu an mangang leh em em. Minister-te kan ṭhukhawm dawn, a fûnpui kan ṭheh dawn," a ti.

Lengpui Airport-a building chim chungchangah Lalruatkima chuan, "Tu mahin PWD minister an thlen khalh lo. Contractor-in a sensoin ti ṭha leh rawh se kan ti a ni," a ti a; Congress sorkar laia lei vawi nga chim leh Laipuitlanga in chimte chu PWD Minister inthlahdah vang niin a sawi.

MNF Adviser chuan, Congress party chu an kawl-âwk tlat tawh nia sawiin, "Ṭhat loh theih lohna báwm an zuar a, kum 10 chhunga ṭha thei hauh lote kha an ni a, midum innawh vàr tum ang chauh an ni," a ti. ZPM chungchangah Lalruatkima chuan, "Volleyball team khat daih office bearer an nei - president, working president, vice president panga bakah leader an la ti. Heng zawng zawng chungah hian val upa council a la awm," a ti a; ZPM-te'n social media aṭanga sorkar an tum niin a sawi bawk.