Session-ah dan ang thlapa ka thil thlen min pawmsak ngai lo - Lalduhoma
ZPM leader Lalduhoma chuan, Assembly session neih zawh tâkah dan ang thlapa a thil thlente pawmsak a ni ngai loh thu leh, dan loa kuhva tawlh rûk chungchanga calling attention a thehluh pawm a nih loh thu a sawi.
ZPM party-in Assembly session neih zawh tâk nimina an pisaa an thlir letnaah Lalduhoma chuan, "Kan zawhna tam tak rorel laite'n min chhànsak lo a, kuhva smuggling chungchanga calling attention ka thehluh pawh min phalsak lo. Dan ang thlapa ka thil thlente min pawmsak ngai lo a, inhmachhawn an ngam lo niin a lang. Session hi a sei an hlau a, chutiang chiah chuan AMC-ah pawh ni hnih chauh hun an hmang a ni," a ti.
Lalduhoma chuan, "Budget session chhangchhe ang reng takah ZPM MLA-te'n hun ṭha tak kan hmang a, huai leh dik taka hun kan hman theihna chhan chu ram pum huapa mi tam takin min ṭawngṭaisak vang a ni," a ti a; ṭawngṭaina chu an rálthuam leh an chakna a nih thu a sawi.
Mipuiin politician-te an hmuh dan a dik lo laklawh tawh tih sawiin Duhoma chuan, "Eiru tur, hlemhle tur leh pamham turah ngaih an ni tlat tawh hi kan siamṭhat a ngai tak zet. Kohhran hruaitu an nih laia an dik lohna kan sawi ngai lohte hi politics-a an zuan luh chuan sawisel rawn an hlawh tawh ṭhin. Kan dik a ngai a, kan dik loh chuan mipuiin nuihza siam nan min hmang mai ṭhin," a ti.
Aizawl North-I bialtu MLA Vanlalhlana chuan, Assembly budget session zawh tâkah ZPM MLA-te'n an tih tur ṭha taka an hlen thu sawiin, an thawhhona a ṭhat thu a sawi. Aizawl North-II MLA Dr Vanlalthlana pawhin, lirtheia eizawngte tana private member bill a put luh chu hnawl ni mah se, la put luh zel a tum thu a sawi a, tuna sorkar siamtute chu budget chungchangah an inzir belh a ṭul thu sawiin, “Mahni budget punna zat pawh hre lo an ni nuk mai hi a mak hle a ni," a ti.
Aizawl South-II MLA Lalchhuanthanga chuan, "Tuna kan budget-ah mipui tan beisei tur a awm lo a, inbumna budget a ni," a ti a; SEDP-ah kum thum chhunga cheng vbc. 1,613 dah tawh zinga a zatve mipuia lut tur hman dan a zawhna an chhàn theih loh thu a sawi. Aizawl West-III MLA VL Zaithanzama pawhin, "Sum tam tak hmanna dik lo ai chuan, kan neih chhun dik taka hman Zoramin a mamawh zawk," a ti bawk.