END-in ruihhlo tam tham tak an man

Excise & Narcotics department (END) enforcement chuan March 11-13, 2022 chhung khan hmun hrang hrangah heroin kg. 2.433 (hawng 198) leh methamphetamine kg. 7.541 grams (mûm 82,951) an man.

END hian March 13, Pathianni zan dar 6 khan Hunthar Vengah heroin gram 335 (hawng 27) leh a neitua puh - Nilianmawia (26) s/o Thatinkhuaia, Falam, Myanmar (Champhai Electric Venga khawsa mek), Zabiakluaia (32) s/o Thatinkhuaia leh Jakob Thang (22) s/o Englianthanga (L), Bualte, Myanmar (tuna Champhai Electric Venga khawsa mek) nia inchhálte an man.

END chuan March 12, Inrinni zan dar 6:30 khan Falkland Vengah heroin gram 40 (hawng 10) leh a neitu nia puh mi pathum - Thangsiansanga (20) s/o Thangdeihtuanga, Champhai Bethel Veng, Lalchhuanawmi (23) d/o Sangzakapa, Champhai Kanan Veng leh Lawrence Lalrinsanga (19) s/o Lalhruaitluanga (L), Zuangtui nia inchhálte an man bawk.

March 11, 2022 chhun khan Mission Veng Bazar leh Mission Vengthlangah heroin gram 74 (hawng 6) leh a neitua puh Zothanpuii (36) d/o Hrangzama, Mission Vengthlang nia inchhál an man.

March 11 chawhnuah Tuirial Airfield-ah heroin gram 51 (hawng 4) leh a neitu nia puh - Lalchamliana (24) s/o C Liantawna, Manzokimi (21) s/o Ropianga leh Zokhumi (25) d/o Zothansanga (L), Zokhawthar vek nia insawite an man a; tlaiah Ṭhuampui, Aizawlah heroin hram 15 leh a neitua puh Lalrinmawia (28) s/o Lalbuatsaiha, Bawngkawn an man bawk.

END leh YMA Sub-Hqrs Champhai hnuaia Anti Drugs Squad-te chuan March 11, 2022 zan khan Ṭiau kawngah heroin kg. 1.918 (hawng 150) leh a neitua puh mi pahnih - Lalṭhapuia (31) s/o Manthankima, West Lungdar leh Lalbiakliana (23) s/o Lalthankima, Bungtlang (Saikhamakawn, Aizawl-a khawsa mek) nia inchhálte an man.

Ṭiau kawnga heroin man kaihhnawihah hian inhnamhnawiha puh dang - Vanlalhriati (43) w/o Zaithanpuia, Zokhawthar chu March 13 zing khan man a ni a, mi dang chhui mek an la awm bakah, two wheeler pahnih hrên a ni.

March 11 vek khan zan dar 7-ah Bethlehem Vengthlangah methamphetamine kg. 7.541 (mûm 82,951) leh a neitua puh Zarzoliani (43) d/o Zokhuma (L), Vaphai, tuna Armed Veng South-a a khawsa mek nia inchhál an man bawk.