Ram hlutna tihniam turin ngen nawn

National Highways and Infrastructure Development Corporation Ltd (NHIDCL) chuan Vairengte leh Sairang inkara national highway kawngpui four lane-a zauh turah zangnadawmna atana ram lak turte ram hlutna tihniam leh turin Competent Authority for Land Acquisition (CALA) an ngen.

Kolasib aṭanga thu dawn danin, NHIDCL-in CALA hnena ngenna a thlen nawn chungchangah hian tunlai thil man nena inrema siam a nih avangin CALA chuan thutlukna a la nei lo nia thu dawn a ni a, ngaihtuah thuai tum a nih thu erawh a sawi thei thung. CALA hi Kolasib additional DC Lallawmawma a ni.

Vairengte-Sairang kawngpui zauh turah hian Package-1, Vairengte VC area leh North Chhimluang VC area-ah chuan NHIDCL chuan zangnadawmna atan cheng vbc. 130 an ruahman chhin a, ram lâkna tura thlai leh thing chhiar zawh a ni tawh.

Package-1 huam chhunga crop compensation atan ringawt pawh a pumpuia sum hman tura NHIDCL-in a ruahman aia tam, cheng vbc. 180 vel a ngai a, chuvang chuan NHDICL chuan ram teh nawn leh an duh a, ram neitute nen tun hnai khan kawngpui kalna tura thlai leh thing awm ennawn leh an remti a ni.

NHIDCL hnuaia kawng siam tura thlan contractor-te chuan an kháwlte Vairengte dáiah an dah tawh nia thu dawn a ni.