Tuikual-in ngaihdam dil turin MLA an phût

YMA, Tuikual North leh Tuikual South branch-te chuan thuchhuah inṭâwm siamin, Assembly session neih zawh tâka Dampa bialtu MLA Lalrintluanga Sailo thusawi chu Tuikual veng hmuhsitnaa an ngaih thu an tarlang a; ngaihdam dil turin an phût.

Tuikual North & South YMA chuan, March 3, 2022-a Assembly session-ah MLA Lalrintluanga'n, 'Bial fanga kan zin haw pawn Tuikual chhukthla velahte hian wire tihchah avanga harsatna tawh avanga, eng nge ni, an TV an lo en theih loh avanga, a... tiang nena intin uaih uaih puitling zanlaiah ka hmu fo mai a,' tia a sawi chu an chhui chiang tih an tarlang a, "Hetianga che àwm hi Tuikual North leh Tuikual South-ah an awm hriat a ni lo," an ti.

Tuikual venga YMA branch pahnih chuan, rorelna in sang berah Tuikual veng hming, a chengte inngeih lo hle anga lang theiah Lalrintluanga Sailo-in a sawi chhuak chu an lawm loh thu sawiin, "Veng hmuhsitnaah kan ngai. Kan state rorelna sang ber record-a ṭha lo taka kan veng hming a awm reng tur hi kan duh lo tak zet," an ti a; Lalrintluanga Sailo chu a thu sawi tawh Assembly record aṭanga nawhrehtir tur leh Tuikual North leh Tuikual South mipui hnena ngaihdam dil turin an phût a ni.