Lengpui Airport-a hna thawh chim chhan chhui turin MPYCC-in Lokayukta an ngen

Mizoram Pradesh Youth Congress Committee (MPYCC) chuan nimin khan Lokayukta chairman C Lalsawta hnenah March 10, 2022 tlaia Lengpui Airport chei ṭhat lai chima a mawhphurtute chhui chiang turin ngenna an thehlut.

MPYCC president Dr Lalmalsawma Nghaka chuan, March 10, 2022 tlai dar 4:30 velah Airport chei ṭhatnaa hna thawh mek slab chu a chim tih sawiin, "A beam leh bante a tliak rem rum a, a chhe hneh hle. Vanneihthlakin mihring nunna chán an awm lo hlauh a, a hmun ngeiah pawl hrang hrangte'n an tlawh hnuah contractor-in a hna a thawh dan a ṭha tâwk lo tih chu a hmáwrbâwkna a ni," a ti.

Lengpui Airport chu a lûn dawn chauh a, mihring tam takin an hman tur a nih thu sawiin Dr Lalmalsawma chuan, "Tunah hna an thawh tawhte pawh a quality min chhuisak a, an hna thawh dan leh hmanrua an hman dante min chhui chiansak turin kan ngen a ni," a ti a; tuna hna thawh dan chu nakin zela mihring nunna atan hlauhawm a nih thu a sawi.

Congress ṭhalaite chuan, Lengpui Airport chei ṭhat hna thawk tur inpek danah thil felhlel a tam thu te, thûk takin eirukna a awm ngeia rin theih a nih thute an tarlang.