Hripui vei enkawl lai 1.09% chiah an awm

March 13, Pathianni khan Mizoramah Covid-19 vei mi 188 hmuh chhuah a ni a, nimin khan Covid-19 vei dam tawh mi 812 chhuahtir niin, mitthi an awm lo. Nimin tlai khan hripui vei enkawl lai 1.09% chiah an awm tawh.

Covid-19 vei March 13-a hmuh chhuahte chu mipa 84 leh hmeichhia 104 an ni a; RAT hmanga hmuh mi 184 leh FIA hmanga hmuh mi pali niin, positivity rate chu 19.05% a ni. RT-PCR leh TrueNAT hmangin swab sample endik a ni lo.

Kum 2011 chhiarpuiah Mizoramah mi 10,97,206 an awm a, chuta ṭanga chhût chuan Covid-19 positive hmuh tawh 2,20,974 chu 20.14% a tling a; India rama state 28 zingah mihring awm zat aṭanga chhûtin Covid-19 vei hmuh tamna ber a ni.

IDSP record angin, Mizoramah Covid-19 vei 2,20,974 hmuh chhuah a ni tawh a, mipa 1,03,135 leh hmeichhia 1,17,839 an ni a, mipa aiin hmeichhia 14,704-in an tam zawk. Nimin tlai dar 5 thleng khan mi 2,17,974 (98.61%) chhuahtir an ni tawh a, mi 671 (0.30%) thi tawhin, enkawl mek mi 2,408 (1.09%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,20,974 chu mi 1,000 zelah hripui vei mi 201 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.

Mizoramah March 12, 2022 thlenga swab sample endik tawh 18,67,318 aṭanga positivity rate chu 11.83% a ni a; RT-PCR hmanga endik zat percentage chu 19.92 a ni a, RAT hmanga endik zat chu 74.42% a tling.