KHAWTHLIR

SRH-ah damlo Inentir theih a ni
State Referral Hospital (ZMC) chu hun eng emaw chen Covid-19 veite chauh enkawlna atana hman a nih hnuah nimin aṭang khan damlo dang tan pawh inentir theih a ni. Thawhṭanni, Nilaini leh Zirtawpniah Medicine, O&G, Pediatrics, Pulmonary Med, Psychiatric leh Dermatology hawn a ni dawn a; Thawhlehni, Ningani leh Inrinniah Surgery, Orthopedic, Eye, ENT, PMR leh Dental-te hawn a ni ang.

Thisen pe
Hrangbana College NSS unit chuan nimin khan an college-ah thisen pek rûnpui an huaihawt a, Aizawl Civil Hospital tan thisen unit 100 an pe a, petute mipa 77 leh hmeichhia 23 an ni.

LC by-election
State Election Commission chuan Chhinga Veng leh Tuikhuahtlang local council by-election hun atan April 1, 2022 a ruat. Inthlana chuh turte tan March 21, 2022 chawhhnu dar 3 thleng hming thehluh theih a ni.

NIT Director
National Institute of Technology, Mizoram director thar Prof. S Sundar chuan nimin khan Prof. Saibal Chatterjee hnen aṭangin director mawhphurhna a la ṭan. Prof. S Sundar hi IIT, Madras-ah thawk ṭhin, post chi hrang hrang a chelh tawh a ni a, kum 2017-2020 chhung Mathematics-ah head of department a ni.

MWA an lawm
Mizo Writers Association chuan thuchhuah siamin, Mizo Language Board a puitling ta chu lawmawm an tih thu an tarlang a, "Mizo ṭawng humhalh leh a ṭhan zelna turah Mizo Language Board hi a ṭangkai hle dawn a ni," an ti.

mPASS titâwp
Covid-19 léng vanga state dang aṭanga Mizorama thlawhtheihna leh lirthei hmanga lut turte leh bungraw phur lirtheite tana mPASS-a inziah luh phawt ngai ṭhin chu nimin khan Disaster Management & Rehabilitation department-in a titawp.