Bru-te'n vote an thlak dan turah ECI thutlukna hriat a la ni lo

Mizoram chief electoral officer (CEO) Ashish Kundra chuan, Tripura relief camp-a Bru-te vote thlaktir dan turah Election Commission of India (ECI)-in an thutlukna an la hriattir lo niin a sawi a, "Inthlan sawn hlat a ngai lo turah ka ngai," a ti.

Ashish Kundra hian Mizoram CEO hna a chelh ṭan ní, November 16, 2018-a thuthar thehdarhtute a kawmnaah, Tripura-a Mizoram Bru-te chu Kanhmunah vote thlaktir tum a nih thu leh, Bru-te vote thlakna tur chungchangah ECI-in November 16-ah thu a tihchian dawn thu a lo sawi tawh a ni.

Vanglaini palai zawhna chhangin Ashish Kundra chuan, Tripura relief camp-a Bru-te tan Kanhmun khawi lai hmunah nge vote thlakna hmun siam a nih ang a, polling station eng zat nge siam a nih dawn tihte ECI-in an la rawn hriattir loh thu a sawi a, "Naktuk (Nov. 20) hian officer dangte nen Kanhmun kan tlawh dawn a, Tripura official-te pawh lo kal turin kan hrilh. Hmalak dan tur kan enfiah dawn a ni," a ti a; vote thlak turte camp aṭanga Kanhmuna phurh hna chu Tripura sorkarin an buaipui tur thu a sawi.

Mizoram CEO chuan, Kan­hmuna Bru-te vote thlak dan tur tih lohah chuan hun tiam angin inthlan atana inpuahchahna kalpui zel a nih thu a sawi a, "Kanhmun tih lohah chuan engkim felfai leh ṭha taka tih zel a ni. Chuvangin, inthlan hun hi tawlh hlat a ngai lo turah ka ngai," a ti.

Tarlan tawh angin, All NGO Coordination Committee chuan Tripura relief camp-a Bru-te chu Mizoram chhung ngeia vote thlaktir turin ECI an ngen a; ECI chuan NGO-te ngenna angin Mizoram chhung ngeia Bru-te vote thlaktir turin ruahmanna an siam a ni.

Heti hlai hian, NGO Coor­dination Committee hruaitute November 17, Inrinnia Central YMA Office-a ṭhukhawm chuan thuchhuah siamin, November 28-a Mizoram Assembly inthlanpui awm turah, ECI leh Mizoram People Forum (MPF) pawhin rem an tih loh, vote thlak tura mipui phurh khawm a awm loh nan candidate leh political party mite chu insûm vek turin an ngen a ni.