ZPM candidate-te lei theih an ni dawn lo - Bualhranga

ZPM Val Upa Council (VUC) member Bualhranga chuan nimin khan ZPM pisaa inkhawmah thu sawiin, ZPM candidate-te chu Pathian leh mihring hmaah thu an tiam a, alu anga lei mai mai theih an ni dawn lo tih a sawi.

Bualhranga chuan, ZPM a sor­kar chuan val upate'n an vil dawn tih sawiin, "Mi ṭhenkhatin VUC hi kawngro su lo tur angin min sawichhe ṭhin. ZPM candidate-te'n mihring leh Pathian hmaah thu an tiam tawh a, a tâwk. BJP-in lei darh mai mai theih tur angin kan candidate-te an sawi a, Pathianin a anpuia a siam kan ni. Kalvari tlangah Kraws-a a tlante kan ni a, alu bag ang mai mai a lei theih an ni lo. Sorkar khalh ngil turin ZPM chhungkuain VUC hi kan pawm chuan a tawk, Constitution-a a awm kher a ngai lo," a ti.

Mihringin a dam chhungah kum 40-70 a nih chhungin ram tana an tih theih tâwk chu an ti tawh tih sawiin Bualhranga chuan, "Party pahnihte hian kum tam tak ram an hruai tawh a, an tih theih tâwk chu kan hmu tawh, a bak tih theih an nei tawh lo a, beisei tur a awm tawh lo," a ti. MNF leh BJP thawhho dan sawiin, "NEDA aṭanga in withdraw duh mang si loa thawkho lo tur anga insawi hi a ṭul lo, awr phiar ṭawng ṭawnga ṭan a ngai lo, ziakin in withdraw mai rawh se," a ti a; MNF chu BJP nen an inthurual lo tak tak a nih chuan NEDA aṭanga inhnûkdâwk turin a phût.

ZPM VUC member dang Rev. Robawiha pawhin thu sawiin, "ZPM-in sorkara a chang a nih chuan opposition MLA-te hian Assembly House chhungah lo chuan seat an nei lo ang a, ruling leh ruling lo an awm tawh dawn lo a, ZPM mi leh sa, member bik an awm lo ang," a ti.

Rev. Robawiha chuan, ZPM chuan mipui sorkar an siam dawn avangin Mizorama Mizo tawh phawt chu mipuite an ni vek tih sawiin, "Mipui sorkar chu an sorkar a nih ve tlat avangin opposition leh lehlam ṭang an awm chuang lo. Assembly House-ah chuan opposition-te'n ṭhutna bik an nei a, House páwn lamah chuan bial tinah danglamna awm loin sorkarin rualkhai takin a enkawl dawn a ni," a ti a; ZPM sorkar chu opposition-te sorkar a nih dawn thu a sawi.

ZPM inkhawm hi Steering Committee chairman Lallian­sawta'n a kaihruai a; ZPM campaign nan Israel rama Mizo awmte'n an thawhkhawm Israel pawisa Sekel 1,000 leh khawvel ram 10 aṭanga Mizo awmte'n ZPM puala an thawhlawm Rs. 1,40,660 an dawn thu a puang a ni.