Sorkarna kan chan chuan bawlhhlawh thaia Eizawn a ngai tawh lo ang - ZPM Leader

Zoram Peoples' Movement (ZPM) chuan nimin khan Aizawl East-I chhunga Airfield Vengah Steering Committee an din thar a; an hun hmanpuitu Aizawl East-I biala ZPM candidate K Sapdanga chuan, sorkarna an chan chuan bawlhhlawh thâia eizawn a ngaih tawh loh tur thu a sawi.

Steering Committee dinna inkhawm hi MPF local forum secretary Upa Vanlalhriatrenga'n a kaihruai a; ZPM leader K Sap­danga chuan, ZPM-in hma an sawn zel tih sawiin, "Sorkarna siam turin kan inbuatsaih mek. Airfield Veng hi khawpui bawlhhlawh paihna hmun a ni a, bawlh­hlawh thâia eizawng an awm chhan hi sorkar dik loh vang a ni. Kan sorkar hunah chuan sawh­thing hmun thloin, kum tin cheng nuai têl kan la lut ang a, bawlhhlawh thai a ngai tawh lo ang," a ti.

K Sapdanga chuan, Mizoram mipuite'n inthlan an nghakhlel tawh tih sawiin, "Tun hma in­thlanah chuan vote tur an hre lo a, vote thlak chu an dikna chanvo a nih si avangin phûr lo takin vote an thlak ṭhin. Tunah chuan ZPM a ding tawh a, ZPM-ah hian Mizo mipuiin beiseina an neih avangin inthlan an nghakhlel tawh a ni. Politics ngaihven ngai reng reng lo ṭhalai rualte pawhin politics an ngaihven tawh," a ti a; ZPM-in sorkarna an chan chuan mipui beiseina an tihhlawhtlin ngei tur thu a sawi.

Aizawl East-I bial chungchang sawiin Sapdanga chuan, "Kan bial chhung hi ka tlawh chhuak vek tawh a, eng nge a mawh a, khawi aṭanga hna thawh ṭan tur nge tih ka chiang tawh hle. Pathian leh mipui zara MLA-a thlan tlin ka nih chuan thlan tlin ka nih tûk aṭangin hmasawnna hna kan thawk nghal ang. Tun hmain hotu anga in en MLA in lo thlang tling tawh a ni mai thei, kei chu in chhiahhlawh ni turin he bialah hian ka rawn ding a ni," a ti.

K Sapdanga chuan, Airfield Veng leh a chhehvelte chu kut hnathawktu tamna hmun a nih thu sawiin, "In thawhrim ang phû tâwk in hlawh chhuak ṭhin lo hi pawi ka ti hle. ZPM chuan thlai tharte hralh dan tur engkim kan ruahman tawh a, sorkarna kan chang a nih chuan man man zawkin in thlai thar chhuahte in hralh thei tawh ang. Kut hnathawktute hmaah kan ding tlat dawn a ni," a ti a; ZPM sorkarah chuan a thawkrim apiang an dinchhuah tur thu a sawi.