CAU Inter-Collegiate Youth Festival ṭan

Nimin aṭang khan College of Veterinary Science & Animal Husbandry (CVSAH), Selesih auditorium-ah Central Agriculture University (CAU), Imphal hnuaia college 12-te intawhkhawmna 5th. Inter-Collegiate Youth Festival 2018 ṭan a ni a, Governor Kummanam Rajasekharan-a'n a hawng.

Governor chuan, CAU, Imphal thuneitute'n hmarchhak state hrang hranga an zirlaite tana intawh khawmna an buatsaih chuan inpumkhatna a thlen a beisei thu sawiin, "Zirna bakah, mi puitling leh khua leh tui ṭha ni turin zirlaite chher an ngai tel. India ram hi hnam hrangte chen hona hmun a nih angin, hmasawna kawngah lungrual taka ke pên a pawimawh hle," a ti.

India ram chu agriculture-a innghat a ni tih sawiin Larsap chuan, "Agriculture university leh college-te pawimawhna pawh mipuiin kan hre chiang a, tuna zir mekte pawh mi tam tak zinga thlan chhuah an nih angin, an zirlai lehkha thiam filawr tak tak an ni," a ti a; CAU hnuaia zirlaite chu ṭan la zual zel a, mithiam hman tlak ni turin a fuih a ni.

CAU Imphal vice chancellor Dr M Premjit Singh pawhin thu sawiin, India hmarchhak biala agriculture leh a kaihhnawih lama hmalak an tum dante a sawi a, "India sorkar hmalakna kal zelah, hmarchhak bial hi 'Green Revolution-2' thlenna hmun atan buatsaih mek a ni a, organic farming ngaih pawimawh bik niin, Mizoram bikah chuan kut hnathawktute'n ram zau tak an neih theih loh avangin sum chang thlai zingah a man to deuh chi sawhthing leh a dangte uar a pawimawh a ni," a ti.

5th. CAU Inter-Collegiate Youth Festival 2018-19 hawnna inkhawm hi CVSAH dean Dr Lalnuntluangi Hmar-in a kaihruai a; CAU director of instruction Dr Sobam Basanta Singh-in festival buatsaih a nih dan leh CAU report a sawi.

CAU Imphal hnuaiah hian state pasarih - Arunachal Pradesh, Manipur, Meghalaya, Mizoram, Nagaland, Sikkim leh Tripura-ahte constituent college 13 leh Krishi Vigyan Kendra (KVK) paruk a awm a; Mizoramah chuan CVSAH, Selesih leh Horticulture College, Thenzawl-te chu CAU Imphal hnuaia constituent college an ni.

CAU Imphal hi January 26, 1993-ah din a ni a; tun ṭuma CAU Inter-Collegiate Youth Festival-ah hian college 12 aṭangin zirlai 350 chuang an tel a, Festival chhungin indoor item hrang hrangah an intihsiak dawn a ni.