Serchhipah World Toilet Day hmang

Serchhip district-a PHE department leh Swachh Bharat Mission (Gramin) chuan nimin khan New Serchhip YMA Hall-ah World Toilet Day an hmang a, Serchhip district chhunga Swachhagrahi-te tan training an buatsaih nghal.

World Toilet Day hmanna inkhawm hi PHE junior engineer H Lalhunthara'n a kaihruai a; PHE executive engineer F Lalsanglura chuan, World Toilet Day chu kum 2013-ah hman ṭan a nih thu sawiin, "He ni hi mihring hriselna atana êk-in pawimawhzia inhrilhhriatna hun atan hman ṭhin a ni," a ti.

F Lalsanglura chuan, naupang thihna tam tak chu êk-in neih ṭhat loh vang a ni tih mithiamte'n an hmu-chhuak tih sawiin, "Ek-in ṭha hman hian naupang kum 5 hnuai lam nunna tam tak kan chhan a ni. Mahni vêng chhungah êk-in ṭha hmang thei lo an awm a nih chuan en liama ngawihbopui mai chi a ni lo," a ti a; êk-in ṭha lo aṭangin natna a chhuak a, chu chuan mi dangte tan natna a thlen ṭhin tih a sawi.

PHE EE chuan, mahni khua/veng ṭheuhah êk-in nei ṭha lote'n êk-in ṭha an hman theih nan Swachhagrahi-te'n hma an lak a ngai dawn tih a sawi a, "Serchhip district hi páwna inthiar awm lohna, open defecation free a nih tawhna chhawm nung zel turin V/C leh khawtlang hruaitute leh department-a thawkte'n hma an lak zel a ngai a ni," a ti.

Swachhagrahi training-ah hian Serchhip district- SBM(G) hnuaia khaw 35 aṭangin Swachhgrahi (sanitation surveyor & worker) atana ruat mi 37 aṭang mi 35 an tel a; SBM(G) district coordinator Samuel Lallawmzuala'n an mawhphurhna leh tih turte a zirtir a ni.