Excise-in zu an mante an tiral

Excise & Narcotics depart­ment (END) chuan zu leh beer chi hrang hrang an man, cheng nuai 92.29 hû chu nimin khan Kolasib-a END hmunah an tiral.

Zu tihral puala inkhawm tâwi buatsaihah END minister Dr K Beichhua chuan, ruihhlo do kawnga harsatna hrang hrang kara Excise force-te thawh­rimnaah lawmthu a sawi a, "Ruihhlo donaah ke kan pên tawh a, hnungtawlh thei kan ni lo. Kan ram leh hnam tichhetu hi mipuiin kan hmelma a ni tih hriain, tih tak zetin i do zel ang u," a ti.

END Minister chuan, zu leh ruihhlo do kawngah mahni mawina leh fak beiseina piah lama ke pên a pawimawh thu sawiin, "Kan ram leh hnam min tichhetu ruihhlo do kawngah hmingchhiat huama kal zel a pawimawh," a ti. Ruihhloin a tihbuai loh chhungkuate pawh nakinah ruihhloin a luhchilh thei a ni tih hria a, ruihhlo do kawngah ke pên turin a sáwm a ni.

Ruihhlo tihralna puala inkhawm hi END deputy commissioner Z Lalhmangaiha'n a kaihruai a; MLA C Lalmuanpuia leh Social Rehabilitation Board vice chairman K Liantlinga te pawhin thu an sawi.