MYC Office cum Coaching Centre hawn a ni ; Pathian chakna hmang thiam kan vannei - CM

Chief minister Zoramthanga chuan nimin khan Secretariat Complex-a Mizoram Youth Commission (MYC) Office-cum-Coaching Centre thar a hawng. CM chuan, Pathian chakna hmang thiam apiang an vanneih thu a sawi.

CM Zoramthanga chuan, MYC chu Pathianin leilung hausakna Mizoram a pek molecule pakhat activate (tinung) tu uranium pakhat a nih thu sawiin, "A hman dan thiam ila, hman dan thiam poh leh in inchhir lo tulh tulh ang. Pathian chakna hmang thiam apiang kan vannei," a ti.

Chief Minister chuan, ṭhalaite hmakhua atan MYC din a nih thu sawiin, "Office ṭha tak hi ṭangkai taka hman a nih a, ṭhalaite tan hmasawnna hna thawh zelna tura lungphûm pawimawh tak ni se a duhawm hle," a ti a; ṭhalaite'n an ṭhat lai hmang ṭangkaiin, theihna an neihte a hun laia hman nachang hria se a duh thu a sawi.

Tun hma chuan zirlaite'n lehkhabu chhiar an duhte an hmuh zawh loh cháng a awm ṭhin tih sawiin Zoramthanga chuan, "Tunlai information khawvela technology hmasawnna zarah awlsam taka thil hriat duh hrang hrangte mobile phone leh computer kaltlanga zawn hmuh zung zung theihna khawvela kan cheng hi ṭhalaite vanneihna a ni," a ti.

Chief Minister chuan, mi ṭhenkhat tan chuan harsatna avanga inhlawh paha lehkha zir a ngaih cháng a awm thei tih sawiin, "Tuna MYC-in all India service-a Mizo ṭhalai a tam thei ang ber an luh theihna tur buatsaih a, zirlai ṭhalaite tan awlsamna a rawn siam hi a lawmawm a, ṭangkai taka hman a nih ka beisei," a ti a; hnam dangin an theih chu Mizo in an theih loh chhan tur a awm loh thu a sawi.

MYC nodal department - LESDE minister Lalchhandama Ralte chuan, MYC chu din a nihna la rei lo hle mahse a ṭhang duang hle tih sawiin, "Ṭhalaite hmakhua ngaih pawimawhna zár niin ka hria," a ti a, kawng hrang hrangah sorkar ṭawiawm turin ṭhalaite a sáwm.

MYC chairman Dr Vanlalṭanpuia pawhin thu sawiin, office hàwn tâk chu ṭhalaite hmun, ṭhalaite ta a nih thu a sawi a, "Tlángnél taka he hmun hi hmang ṭangkai turin ṭhalaite ka sáwm a ni. All India service-ah ṭhalai tam zawk an luh theihna tura ṭhalaite buatsaihna atana cheng vbc 2.66 dah a ni hi a lawmawm hle a ni," a ti.

Chief Minister-in MYC hmun a hàwn hi cheng nuai 300 sénga sak a ni.