Aizawlah mipuiin bawlhhlawh paih man an chàwi ṭhin a pung dawn - Aizawl Mayor

Aizawl mayor Lalrinenga Sailo chuan, sorkar kum thar, April 2022 aṭangin Aizawl khawpuiah bawlhhlawh paih man mipuiin an chàwi ṭhin chu tihpun a nih dawn thu a sawi.

Nimina Venghnuai Local Council hruaitute nen an inkawmnaah Lalrinenga Sailo chuan, Tuiriala bawlhhlawh sâwngbàwlna hmun Solid Waste Management Center chu AMC kutah a awm tawh thu a sawi a, “Hemi enkawlna tur pawisa inhlan tel a nih loh avangin AMC tan senso a hautak dawn. Aizawl khawpui faina kawnga hna kan thawh theih nan mipui lam chakna hman tel a ṭul dawn a ni,” a ti.

Tun hnaia AMC Board of Councillors ṭhukhawmin bawlhhlawh paihna senso intùm sem dan chu tihdanglam a remtih thu sawiin Mayor chuan, “AMC-in 80% an tùm ṭhin chu 60% a tum tawh dawn a, local council tùm tur tisangin 20% ni ṭhin chu 40% an tum tawh ang,” a ti a; chuvang chuan mipuiin bawlhhlawh paih man an chàwi ṭhin chu tuna an chàwi zat aṭangin a lêta a pun a ngaih tawh dawn thu a sawi.

Aizawl Mayor chuan, tuna bawlhhlawh paih man mipuiin an chàwi mek chu kum 10 kaltaa bituk a nih thu sawiin, “Thil man a to chho zel nen, bawlhhlawh paih man tihsan a ni hi mipui pawhin an hrethiam hle niin kan hria. Aizawl khawpui a thianghlim zel theih nan AMC, local council leh mipui kan ṭan rual a ngai hle,” a ti.