Governor's Gold leh Silver Medal sem

Governor Hari Babu Kambhampati chuan nimin khan Raj Bhavan-ah Governor’s Gold leh Silver Medal dawng tura thlan mi 11 hnenah medal a hlân. Medal hi kumin Republic Day lawmnaa hlan tur a ni a, mahse, Covid-19 leng avangin hlan theih a ni lo.

Governor chuan, chawimawi tlâkte chawimawi chu khua leh tui ṭhate tih tur leh intihphûr tawnna pawimawh tak a nih thu a sawi a, "Mizoram sorkar hnathawk zingah mahni hnaa inpe leh hna an thawh ṭhat vanga chawimawi phûte chu Governor’s Medal kum tin pek zel a ni dawn. Kuminah Police leh Excise & Narcotics department-a hna thawk ṭha tak tak zingah mi 11 thlan an ni a, sorkar department danga thawk ṭhate pawhin he chawimawina hi an dawng thei a ni," a ti.

Sorkar hna chu mipui vantlang rawngbawlna a nih avangin sorkar hnain mi tam tak ni tin nunah kawngro a sû tih sawiin Hari Babu Kambhampati chuan, "Sorkar hnathawk, mahni hnaa inpete chuan mipui tan awlsamna kawng tam takah a siamsak ṭhin. Mipui rawngbawl hna hi hna ropui tak a ni tih sorkar hnathawkte'n an hriat reng a ngai," a ti a; ni tina mamawhtute tan ṭanpuitu nih tum chung leh hlim hmél pu chungin, taimakna leh inpekna thûk zawk nen hna thawk ṭhin turin sorkar hnathawkte a chah.

Medal semna inkhawm hi Home secretary H Lalengmawia'n a kaihruai a, Home minister Lalchamliana leh Excise & Narcotics minister Dr K Beichhua te pawhin thu an sawi a ni.