World Consumer Rights Day hman a ni

Nimin March 15 kha World Consumer Rights Day a ni a, district khawpui hrang hrangah hman a ni.

World Consumer Rights Day hi Lungleiah chuan YMA Sub-Hqrs., Lunglei conference hall-ah hman niin, Lunglei District Consumer Association president JL Hmingthanga'n a kaihruai a, additional district & session judge F Rohlupuia khuallian a ni. Khuallian chuan, consumer-te'n harsatna an tawh chungchangah thubuai thehluh a tam loh thu leh harsatnate Commission-a thlen intihhmuh a ṭul thu a sawi.

Champhaiah chuan DC conference hall-ah hman a ni a, district bawrhsap mawhphurhna la mektu Henry C Lalrawnkima'n a hmanpui. Henry C Lalrawnkima chuan, dikna palzût a nihin hmaizah nei loa dan hnuaia huai taka hmalak a pawimawh thu a sawi. He hunah hian mithiamte'n consumer rights an sawifiah a, Consumer Protection Act lehkhabu an sem bawk.

Serchhipah chuan bawrhsap Nazuk Kumar hoin DC conference hall-ah hman a ni a; Nazuk Kumar chuan, mi tinin invênna tur an hriat chian a ṭul thu a sawi. Inkhawmah hian mithiamte'n Ponzi Scheme (chiahpuam) leh consumer-te dikna chanvo chungchang an sawifiah a ni.

Lawngtlaiah chuan DC conference hall-ah hman niin, bawrhsap mawhphurhna la mektu Marilyn Rualzakhumthangi'n a hmanpui. Marilyn Rualzakhumthangi chuan, consumer-te'n dikna chanvo an neih chu danin ṭha taka a humhalh thu leh chhawr ṭangkai nachang hriat a pawimawh thu a sawi.

World Consumer Rights Day hi Mamitah pawh IPR conference hall-ah Mamit District Consumer's Organisation huaihawtin hman a ni a; khuallian Lalnunhlua, DC chuan, "Consumer dinhmuna ding vek kan nih avangin lei leh hralh chungchanga kan dikna chanvo hriat hi kan mawhphurhna a ni," a ti.