Zokhawtharah hma la vat turin sorkar ngen

Mizoram Pradesh Congress Committee (MPCC) Vigilance chuan, Zokhawthar leh a chhehvela harsatna, socio-economic degradation ngai pawimawh a, rang taka dan anga mumal taka hma la turin Mizoram sorkar a ngen a; Champhai-Zokhawthar kawng chu uluk taka enfiah nawn a ṭul thu an sawi bawk.

MPCC Vigilance team chuan March 10-12, 2022 chhung khan Zokhawtharah Indo-Myanmar international trade chungchang zir chiangin an feh chhuak a; khawchhak lam kuhvaa sumdawngte leh inhnamhnawihte an kawm bakah, Champhai NGO Coordination hruaitute an kâwm a ni.

MPCC Vigilance chuan, Myanmar aṭanga dan loa kuhva lak luh chu dan kalha thil tih (smuggled goods) ni tho mah se, Champhai district-a mi tam tak chuan kuhva, vawktê, blanket, thlai, zawngṭah leh nepnawi chi hrang hrangte chu smuggling thilah an ngai meuh lo a, silai, rangkachak leh ruihhlo tawlh rûkte erawh chu thil sual tihnaah an ngai tih an tarlang.

In 800 vel awmna leh mi 3,000 chuang chenna Zokhawtharah an innghahna ber border trade a chawlh ṭhup avangin eibàr zawn leh khawtlang nunah harsatna tam tak an tâwk nia sawiin MPCC Vigilance chuan, “Mizoram border trade town pawimawh ber Zokhawthar, Mizoram Dubai ni thei mai tur chhawr hleih theih lohin a awm mek a, an harsatna hi ngai pawimawhin, dan ang taka mumal leh chak taka hma la vat turin Mizoram sorkar kan duh a ni,” an ti.

MPCC Vigilance chuan, World Bank aṭanga sum hmuh hmanga Champhai leh Zokhawthar inkar kawng siam mek chu Zokhawthar thlen hma lawk hmun pahnihah kawng chhak aṭanga lei leh lung tawlhin a tichhe vek tawh tih an sawi a; engineer leh geologist-te’n uluk taka an enfiah nawn a, chhiatrupna nasa zawk thleng theite chu fûr hma ngeia sorkarin a siamṭhat a ṭul thu an sawi a ni.