NH-54 zauh mekah zangnadawmna vangin hmun pakuaah hna thawk thei rih lo

MJA, Serchhip district member-te chuan March 14, Thawhṭanni khan National Highway-54 laih zau hna thawh mek a hmunah an enfiah a; Package-II (Mualkawi-Keiṭum inkar)-a hna thawktu KRAM Infracon Ltd. hotute chuan, zangnadawmnaah harsatna a awm avangin Chhingchhip leh Kikawn inkara ram lâk turah harsatna a awm a, hmun pakuaah hna an la thawh ṭan theih loh thu an lo hrilh.

KRAM Infracon Ltd. hotute sawi danin, ram lâk chungchang vanga hna an la thawh ṭan theih lohna zinga hmun paruk chu ram neituten zángnadawmna an la dawn loh vang a ni a, hna thawh an phal lo. Hmun dang pathum chu kawng survey laia chhiar hmaih (missing plot) a ni.

Hna thawktute chuan, hna thawh ṭan thuai a, fûr ruahtui tlak hmaa zawh hman an duh thu Serchhip MJA-te an hrilh a, "Ram laka harsatna awm hi keini chinfel theih a nih loh avangin thuneitute'n min chinfelsak thuai se kan duh," an ti.

Package II-in a huam chin hi km. 60 (65-125)-a thui a ni a, lei laih (formation cutting) bik chu 80% an thawk zo tawh a, blacktop hna thawh km. 22.2 an zo tawh. Hna thawh tawh chin chu thawh tur zawng zawng aṭanga chhûtin 37% a ni.