Champhai district-a bank-te'n CD ratio bituk zat an pha lo

Champhai District Consultative Committee (DCC)/ District Level Review Committee (DLRC) chu an chairman Henry C Lalrawnkima, district bawrhsap mawhphurhna la mektu hoin nimin khan DC conference hall-ah an ṭhu a; October-December 2021 chhunga Champhai district-a RD Block pahniha bank leh stakeholder-te hmalakna thlirhoin, bank-te'n credit deposit ratio (CD ratio) target an phâk loh thu tarlan a ni.

Henry C Lalrawnkima chuan, bank chhawr ṭangkai dan leh hman kawnga fimkhur a ṭulna hrang hrangte Mizo ṭawnga zau zawka mipui zirtir turin bank hotute a chah a; loan pek chhuah kawngah ṭan lak a ngaih thu a sawi bawk.

Ṭhutkhawma tarlan danin, October-December 2021 quarters chhung khan Champhai district-a bank hrang hranga credit deposit ratio (CD ratio) chu 59.67% a ni a; July-September 2021 quarter chhunga CD ratio 48.36% aiin 11.31%-in a sang zawk a, CD ratio bituk zat 60% erawh an la pha lo.

Financial year 2021-22 (April 2021 - March 2022) chhungin priority sector atana target cheng nuai 13,010.70 aṭangin cheng nuai 13,041.75 (100.04%) leh non-priority sector hnuaia target cheng nuai 1,364 aṭangin cheng nuai 3,406.82 (249.76%) tihhlawhtlin a ni tawh. PMMY kaltlangin Sishu hnuaiah mi 93, Kishore hnuaiah mi 219, Tarun hnuaiah mi 38, Stand up India hnuaiah mi pathum, an vaiin mi 353 hnenah loan cheng nuai 724.02 pek a ni.

December 2021 thleng khan PMJDY hnuaiah mi 22,988, PMJJBY hnuaiah mi 10,419, PMSBY hnuaiah mi 16,404 leh APY hnuaiah mi 639 an inziak lut a ni.

Champhai district-ah hian bank branch hrang hrang 17 a awm a, public sector bank leh private sector bank panga ve ve, regional rural bank paruk leh state cooperative bank pakhat a awm. ATM booth pakua, business correspondent pariat, CSP pakhat, IPPB hnuaiah banking touch point 26 leh financial literacy centre pahnih a awm bawk.