Tuia mipui harsatna sutkiansak turin ngen

Tunlaia Aizawl khawpuia tui haw mumal lo chungchangah Congress party hruaitute chuan nimin khan PHE engineer-in-chief C Lalremsiama an hmu a; tuia mipui harsatnate theihtawp chhuaha sutkiansak turin an ngen.

MPYCC hruaitute chuan Aizawla veng hrang hrangah tui a haw mumal loh avang leh tui a haw pawhin a haw rei lo ṭhin tih an hriat avangin hma an la a, Tlawng luiah tui pump tur a tam rih tih an hmuh avangin PHE E-in-C chu a pisaah thil awmzia an zâwt a ni.

MPYCC president Dr Lalmalsawma Nghaka chuan, PHE department-a thawktute inpekna a ropui an tih thu sawiin, “Tui sem a mumal lohzia Aizawlah report a tam hle a, mipui an mangang tak zet. Ṭhál tak tak a ni dawn chauh a, Covid-19 hripuiin kum hnih min sawp hnuah mipui tam tak sum leh pai leh eizawnnain a tuar a, mi tam zawk tan tui lei maite a harsa a ni,” a ti a; theihtawp chhuaha mipui harsatna sukiang turin PHE hotute a ngen a ni.

Dr Lalmalsawma chuan, “Pu Zodintluanga PHE minister a nih lai khan tui a haw tam a, a haw regular a, a haw hun tur pawh SMS-a hriattir lâwk ṭhin kan ni,” a ti a; tuihna humhalh kawngah theihtawp chhuah turin mipui a sáwm.

PHE E-in-C C Lalremsiama chuan, GAWSS Phase-I chu ni khatah tui litre nuai 100 pump tura duan ni mahse kháwl a hlui tawh avangin a pump tur zat a pump theih tawh loh thu leh, Phase-II chu ni khatah litre nuai 240 pump tura duan a nih thu a sawi a, “Phase-II hi khawl pahnih litre nuai 120 ve ve pump tur a ni a, pakhat zawk hi February 2022 khan kár li a chhia a, chu chuan tun thlengin tui sem kawngah min nghawng a ni,” a ti.

PHE E-in-C sawi danin, GAWSS Phase-II khawl chhia pakhat chu siamṭhat a ni tawh a, dan pangngaiin tui pump mek a ni a; kháwlte chu la chhe leh thut thei a nih avangin a thlakna tur an chah mek. Tlawng lui tui a kâm nasat avangin Tlawng lui dung humhalh nan cheng vbc. 100 hu project an siam bawk.