Hripui vei enkawl lai 2,379 (1.08%) an awm

March 14, Thawhṭanni khan Mizoramah Covid-19 vei mi 494 hmuh chhuah a ni a, March 13 aiin hmuh chhuah zat tam zawk mah se, positivity rate a hniam zawk.

Nimin khan Covid-19 vei dam tawh mi 522 chhuahtir an ni a, Covid-19 vei enkawl lai mi pakhat a thi. Nimin tlai khan hripui vei enkawl lai mi 2,379 (1.08%) chiah an awm.

Covid-19 vei March 14-a hmuh chhuahte chu mipa 220 leh hmeichhia 274 an ni a; RT-PCR laboratory-a hmuh mi 39, TrueNAT hmanga hmuh 18 leh RAT hmanga hmuh 437 niin, positivity rate chu 14.51% a ni.

IDSP record angin, Mizoramah Covid-19 vei 2,21,468 hmuh chhuah a ni tawh a, mipa 1,03,355 leh hmeichhia 1,18,113 an ni a, mipa aiin hmeichhia 14,758-in an tam zawk. Nimin tlai dar 5 thleng khan mi 2,18,417 (98.62%) chhuahtir an ni tawh a, mi 672 (0.30%) thi tawhin, enkawl mek mi 2,379 (1.08%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,21,468 chu mi 1,000 zelah hripui vei mi 201 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.

Mizoramah March 14, 2022 thlenga swab sample endik tawh 18,70,723 aṭanga positivity rate chu 11.84% a ni a; RT-PCR hmanga endik zat percentage chu 19.89 a ni a, RAT hmanga endik zat chu 74.46% a tling.

Nimin tlai dinhmun angin, State Referral Hospital (ZMC)-ah Covid-19 vei mi 56 enkawl mek a ni a, chu'ng zinga mi paruk chu ICU-ah enkawl niin, an zinga mi pathum chu ventilator hmantir an ni.