KHAWTHLIR

MJA-in thisen pe
Mizoram Journalists' Association (MJA) Gen. Hqrs chuan MJA Golden Jubilee, March 23, 2022 pualin nimin khan Civil Hospital, Aizawl blood bank-ah thisen pêk an huaihawt a, thisen unit 16 pein, petute mipa 15 leh hmeichhia pakhat an ni. Thisen petute zingah MJA member ni lo mi pathum an tel. ṬKP, Lawngtlai Salem Unit pawhin nimin khan District Hospital tan thisen unit 20 an pe a, petute mipa 16 leh hmeichhia pali an ni.

MPSC member
Vanlalngaihsaka, IAS (Rtd.) chu Mizoram Public Service Commission (MPSC) member atan ruat a ni a, nimin khan hriattirna (notification) tihchhuah a ni. Vanlalngaihsaka'n thla khata a hlawh tur chu Rs 2,04,000 a ni ang.

A thlâwna inentirna
Rotary Club of Aizawl, Aizawl Adventist Hospital leh Mizoram Mobile Drugs Dealer Association-te ṭangho chuan nimin khan Khàmráng khuaah Health Free Clinic an buatsaih a, mi 150 vel hriselna dinhmun an endik. Inentir tura kalte hnenah MMDDA-in damdawi an thawh khawmte a thlawna sem a ni.

MJA-in tlawh
MJA, Mamit district member-te chuan nimin khan an president C Lalramdinzela hoin Dárlâk khuaa Horticulture department hmalaknaa dawnfawh chìnna hmun an tlawh. Darlak khuaah hian dawnfawh chíng mi 15 an awm a; a thar hmasa chu December 2021-a bul an ṭan niin, hna thawhna atana an senso zawng zawng chu Rs 3,00,000 a ni a, an thar chhuah hralhna man têl an inbeisei chu Rs 8,00,000 vel a ni.

Sorkar phût
Peoples' Conference ṭhalaite chuan, National Health Mission (NHM), Mizoram hnuaia thawkte'n sorkara an phûtte chu a rang thei ang bera tihhlawhtlinsak turin Mizoram sorkar an phût.