Kawlphetha man tihsan a ni dawn ; Tihsanna zat tur bithliah a la ni lo

Joint Electricity Regulatory Commission (JERC) for Manipur & Mizoram chuan Mizoram sorkarin rawtna a thlen angin Mizorama kawlphetha hman man a tisang dawn a, tihsanna zat tur erawh a la bithliah lo.

Vanglaini palai zawhna chhangin JERC hotute chuan, Mizoram sorkarin rawtna a thlen angin kawlphetha hman man tihsan a nih dawn thu an sawi a, “Kawlphetha man thar tur hi kan bithliah ṭêp tawh. Technical thil eng emaw zir chian ngai a la awm a, hei pawh hi zawh a ni ṭep tawh a, kar leh lamah chuan kawlphetha man thar tur kan bithliah hman kan beisei,” an ti.

Mizoram sorkar chuan JERC hnenah hian kum 2022-23 chhung atana kawlphetha hman man tihsan a rawt a, kum 2022-23 atana power tariff thar tura rawt chu kum 2021-22 chhunga tariff aṭangin 21.05%-in a pung a ni.

Mizoram sorkarin kawl­phetha hman man tihsan a rawtna hi political party ṭhenkhat chuan an dodal a, an duh lohna chhante JERC-ah an thlen a ni. JERC chuan public hearing a ko tawh a, political party-te’n power tariff tihsan an duh loh chhan an sawi a, Power & Electricity department lamin tihsan a ṭul chhan an sawi thung.

Tun hnai kum sarih chhungin kum tin kawlphetha hman man tihsan a ni a, a punna percentage a sàn ber ṭum chu kum 2020-21 kha niin, 26.59%-in a pung a, a punna percentage a hniam ber ṭum, kum 2015-16 khan 2% chiah a ni thung.

Mizoram sorkarin rawtna a siam anga power tariff tihsan a nih chuan, sorkarin a subsidise hnuah chawhrualin power unit khat man Rs. 8.80 a ni dawn a, tariff hman mekah chuan power unit khat man Rs. 6.71 a ni.

Sorkar kum kal mek (2021-22) power tariff atan Mizoram sorkar chuan nikum (2021) khan 41.92%-a tihsan a lo rawt tawh a, mahse, JERC chuan Mizoram sorkar rawtna chu pawm loin, 20.68%-in a tisang a ni.