Kum 12-14 inkarte hnenah Covid vaccine pek ṭan a ni

Nimin khan India ram pumah tleirawl kum 12-14 inkarte hnenah Covid-19 laka invenna damdawi (vaccine), Corbevax pek ṭan a ni a, Mizoramah pawh Aizawlah pek ṭan nghal a ni.

Health department aṭanga thu dawn danin, tleirawl kum 12-14 inkarte hnenah Covid-19 vaccine pek ṭanna hi Aizawlah chuan Bawngkawn South YMA Hall-ah neih a ni a, mi eng emaw zat hnenah pek a ni. Mizorama kum 12-14 inkar Covid vaccine pek tur zata chhût chu 44,000 an ni a, mipa 23,000 leh hmeichhia 21,000 an ni. Vaccine pek hi Mizoram district dangah chuan March 21, 2022-ah ṭan a ni ang.

Kum 12-14 inkar hnena Covid vaccine pek tur Corbevax hi Biological E. Limited siam a ni a; dose khatna lâk aṭanga ni 28 hnuah dose hnihna lâk tur niin, pek turte chu kum 2010 leh a hma lama piangte an ni. Corbevax hi Mizoram chuan dose 40,500 a dawng tawh.

Kum 60 chung lam, Covid vaccine (Covishield) dose hnihna la tawh, dose hnihna lak aṭanga thla kua ral tawhte tan precaution dose lak theih a ni tawh tih Health department chuan an tarlang bawk.