NIT-Mizoram tan ṭan lâk a ṭul - Governor

Governor Dr Hari Babu Kambhampati leh National Institute of Technology (NIT), Mizoram director thar Prof. S Sundar-te chu nimin khan Raj Bhavan-ah an inkâwm. Larsap chuan, NIT Mizoram hmun tharah in leh ṭul dangte sak ṭan thuai a nih theih nan ṭan la turin a chah a, a theihna zâwnah ṭan lak ve a tum thu a sawi.

Tuna NIT-Mizorama zirtirtu thawk lai awm zat chu sanction post awm zat aṭanga chhûtin a zatve (50%) vel chauh a la nih thu sawiin Dr Hari Babu Kambhampati chuan, “Zirtirtu lâk belh kawngah ṭan lak a ngai,” a ti.

Governor chuan, NIT chu India rama technology institute ṭha ber zinga mi a nih thu leh Mizoramin a nei ve chu vanneithlak a tih thu sawiin, “Mizorama chengte tan bika seat hauhsak chu all India entrance exam kaltlanga hnawhkhah tur a nih avangin kan zirlaite pawh an ṭan viau a ngai,” a ti a; Mizo ṭhalai engineer ṭha leh entrepreneur tam tak an inzir chhuah ngei a beisei thu a sawi.

Prof. S Sundar chuan, zirlai tam zawk an neih theih nan hmalak tum a nih thu sawiin, “NIT-Mizoram campus-ah in sak a nih thuai theih nan sorkar puihna kan mamawh a, environmental clearance nghah mek a ni,” a ti a; NIT-Mizoram chu India hmarchhaka technology institute ṭha ber pawl ni tur leh India ram hmun tin aṭanga zirlaite pan châk ni turin theihtawp chhuah a tum thu leh, IIT-Madras nen thawhhona thuthlung ziah thuai an inbeisei thu a sawi bawk.

NIT-Mizoram hi kum 2010-ah din a ni a, B.Tech, M.Tech leh Ph.D zirna kalpui mek a ni. Zirtirtu 75 awm turah 38 an awm mek a, zirlai 190 an awm mek bawk. NIT-a lut turin all India entrance exam - Joint Entrance Exam (JEE) paltlang a ngai.

Governor leh NIT Director inkawmnaah hian NIT registrar Dr Lalchhandami Sailo pawh a tel a ni.