Mizoramin FCI aṭanga buhfai a dàwn tipung turin MP Vena’n Central a ngen

Rajya Sabha MP K Vanlalvena chuan nimin khan Parliament budget session-ah thu sawiin, Mizoramin Food Corporation of India (FCI) aṭanga thla tin buhfai a dàwn zat tipung turin sorkar laipui a ngen a; Mizoramin FCI Regional Office a mamawh thu a sawi bawk.

K Vanlalvena chuan, Mizoramin buhfai a mamawh chanve chauh FCI aṭangin a man tláwma a hmuh ṭhin thu sawiin, “A zatve dang chu open market aṭangin Mizoram sorkarin to zawkin a lei a ngai,” a ti a; FCI aṭanga Mizoram buhfai dàwn zat tipung turin sorkar laipui a ngen a ni.

Hmarchhak state hrang hranga FCI awm dan chu tihdanglam a ṭul thu sawiin Vanlalvena chuan, “Assam, Arunachal Pradesh, Nagaland leh Manipur ten anmahni state-ah ṭheuh FCI Regional office an neih laiin, Mizoram, Tripura leh Meghalaya ten office pakhat, Shillong-a mi an inṭâwm hi a dik lo, state pathumte hian a hrangin FCI regional office an neih a ṭul a ni,” a ti.

Sorkar thuchhuah tarlan danin, nimina Parliament session-ah K Vanlalvena’n thu a sawi ṭan laiin Rajya Sabha chairman M Venkaiah Naidu chuan tun hnaiah Mizoram a tlawh thu te, state Assembly session-ah thu a sawi thu leh, Mizoram Legislative Assembly chhunga rorelna kalpui dan chu buaina awm ve ngai lo, ram pum tan entawn tlak a nih thu a sawi a ni.