Hmawngbuchhuah thlenga rél kawng siam tum ṭhulh a ni

Sairang aṭanga Lawngtlai district-a Myanmar ramri hnaih Hmawngbuchhuah thlenga rél kawng siam tumna chu sum a hautak avangin ṭhulh rih a nih thu nimin khan Parliament session-ah tarlan a ni.

Lok Sabha MP C Lalrosanga’n Parliament session-ah Mizorama rél kawng siam chungchang a zawh chu Railways minister Ashwini Vaishnaw chuan ziaka chhangin, “Sairang aṭanga Hmawngbuchhuah thlenga rél kawng hi a siamna senso tur nena chhûtin a hlâwk dawn loh êm avangin hmalak zui theih a ni lo,” a ti a; rate of return (RoR) chu -10.45% ni tura chhût a nih thu a tarlang.

Railways Minister tarlan danin, Sairang aṭanga Hmawngbuchhuah thlenga rél kawng siam rawtna enfiahin Reconnaisance Engineering-cum-Traffic Survey lak a ni. Survey-a a lan danin, rél kawng chu km. 223-a thui ni tura chhût a ni a, rél kawng lian (broad gauge) siam nan cheng vbc. 15,007 a ngai dawna chhût a ni.

MP hian dâk-in (post office)-a core banking facility dah chungchang a zawt bawk a, minister of state for Communications Devusinh Chauhan chuan ziaka chhangin, “Communications Ministry hnuaiah Mizorama dâk-in 64-ah core banking facility dah tum a ni,” a ti.

Devusinh Chauhan chuan, India ram puma post office zawng zawng 1,58,526 zinga 1,52,514-ah core banking system hman a ni tawh a; core banking system chuan hmarchhak biala hmun kilkhâwr zawk leh thingtlanga net banking, mobile banking leh ATM leh post office accounts khawih a tiawlsam dawn tih a tarlang bawk.