KHAWTHLIR
Thisen pe
Hrangbana College NSS chuan tun kar chhunga a vawi hnih nan nimin khan an college-ah thisen pek rûnpui huaihawt lehin, Civil Hospital, Aizawl tan thisen unit 157 an pe a, petute mipa 123 leh hmeichhia 34 an ni. HBC hian March 14, Thawhṭanni khan unit 100 an lo pe tawh bawk. Helen Lowry College NSS pawhin nimin khan Civil Hospital, Aizawl tan thisen unit 11 an pe a, petute mipa pariat leh hmeichhia pathum an ni.
Sikul hawng
Human Resources Development Board vice chairman L Thangmawia, MLA chuan nimin khan a bial chhung Dulte khuaah high school (adhoc aided) sak thar a hawng a, NABARD sum cheng nuai 75 sénga sak a ni. L Thangmawia chuan, sorkarin SEDP a kalpui tur chu hlawhtling tlaka thawk turin a bial mipui a ngen.
NGDRS zirho
Lunglei DRDA conference hall-ah nimin khan huan, lo, ram neitu inthlaknate awlsam leh felfai zawka ziaha chhinchhiahna tur Computerization of Registration, National Generic Document Registration System (NGDRS) zirhona buatsaih a ni a, Land Revenue and Settlement department-a thawkte leh common service centre operator-te an tel.
MJA lawmpui
Lawngtlaia Information & Public Relations office chuan nimin khan Mizoram Journalists' Association (MJA) Golden Jubilee pualin MJA, Lawngtlai district hnenah lawmpuina leh duhsakna thuchei an hlân. Lawmpuina hi IPRO C Lalhruaitluanga'n Lawngtlai MJA president Lalngheta Ralte hnenah a hlân a ni.
Expo Dubai-ah tel
Expo 2020 Dubai neih mekah Ministry of DONER hmalaknain hmarchhak state aṭang start-up 30 an tel a, Mizoram aṭangin Planning and Programme Implementation department tirhin Laldinpuii, Lailen Consultancy leh Lalrinfela, Tribeland Coffee-te an tel. Mizoram aṭanga telte hian nimin khan an hmalak dan leh hmalak zel dan tur an sawifiah a, zawhnate an chháng bawk.
MLA-in tlawh
Aizawl South-II bialtu MLA Lalchhuanthanga chuan nimin khan a bial chhunga health sub centre leh health clinic hrang hrang a tlawh kual a, an mamawhte a hmunah a enfiah. Lalchhuanthanga chuan health sub centre leh clinic-a thawkte chu an mamawhte ziaka a hnena thlen turin a hrilh.
Heroin man
Aizawl PS and Bazar Beat Post team-te chuan nimin khan New Market-ah Lalbiaksui (22), Myanmar hnen aṭangin heroin gram 34.06 an man. Heroin hi tualchhunga hralhna ang chuan cheng nuai 1.5 man hu a ni.