Sakhi - One Stop Centre hawng

Hmeichhe baihvaite tlûk luh lailâwkna tur, 'Sakhi - One Stop Centre' (OSC) chu nimin khan Serchhip P&E Vengah bawrhsap Nazuk Kumar-i'n a hawng. OSC hi Ministry of Women & Child Development bultumin cheng nuai 46 sênga sak a ni.

Nazuk Kumar chuan, hmeichhia harsatna nei tan OSC chu a hlu hle tih sawiin, "Hmeichhiate'n vantlang bakah mahni in chhungah ngei pawh hleilenna kan tâwk palh thei a, chhantu nei loin harsatna leh hrehawmnain min delh bet tlat thei. Chutiang harsatna tâwkte'n OSC hi pan nachang hria ila, min ṭanpui tur leh a ṭul anga dan anga min humhim turin an inpeih reng a ni," a ti a, phone hmang pawha biak theih a nih thu a sawi.

OSC hi hmeichhia hleilenna tuar te, nupa kara harsatna nei emaw, mahnia harsatna sukiang zo lo emawte tan pan theih a ni a, ni nga leh zan nga thleng awm lailâwk theih a nih bakah, a ṭul angin an harsatnate buaipui zui theih a ni.

Serchhip DC pisaah hian hun eng emaw chen harsatna tâwk hmeichhiate buaipuina kalpui a ni tawh a, tun thlengin case 56 an nei tawh.

Serchhip OSC hi phone number 8415049957 / 8974582937/ 9862378955-ahte biak theih a ni.