Aizawlah Swachhata Pakhwada hmang
Aizawl district bawrhsap Dr Lalhriatzuali Ralte hoin nimin khan Taxation auditorium-ah Swachhata Pakhwada hman a ni a; thupui chu 'Curb the use of single-use plastic and discourage the use of plastic in the office' tih a ni.
Dr Lalhriatzuali Ralte chuan, plastic hman tlêm a ṭul thu sawiin, "Mahni mawhphurhna leh tih tura dah a, mahni aṭanga bul ṭan a ngai. Nasa lehzuala mahni in, office leh awmna hmun ṭheuhah vawi khat chauh hman chi plastic hman tlem a pawimawh," a ti a; sikul naupangte zingah zirtirtute kaltlangin plastic ṭhat lohzia inzirtirna bul ṭan leh kohhran leh tlawmngai pawl hrang hrangte nen zau zawka zirtirna kalpui ṭul a tih thu a sawi.
Inkhawmah hian Aizawl DC chuan 'Covid-19 & Cleanliness' tih thupui hmanga auhla (slogan) inziahsiaka tiṭhate hnenah lawmman a sem a ni.
Swachhata Pakhwada hi India ramin faina lama chak zawka hma a sawn theihna tura Swachh Bharat beihpui thlak mek tihchak nan leh mipui mimir, khua leh tuite'n faina lama an mawhphurhna an hriat tam lehzual theihna atana buatsaih a ni a; sorkar laipui chuan state-te zawm turin tih tur hrang hrang a duang a ni.