Central politics leh Mizoram politics hi a hrang hlak a ni - MPCC President

Mizoram Pradesh Congress Committee (MPCC) chuan nimin khan an president Lalsawta lehkhabu ziah, 'Ṭhat loh theih lohna báwm' zir chianna hun Lal Thanhawla Auditorium-ah an buatsaih. Lalsawta chuan, central politics leh Mizoram politics chu a hrang hlak a nih thu a sawi.

MPCC President chuan, MPCC-in All India Congress Committee (AICC) constitution ring loin, constitution hran a neih thu sawiin, "Central Congress nen tih dan leh kalhmang tam tak a danglam. Chuvangin, central politics leh Mizoram politics hi a hrang hlak. Central lama kan party chêt chhiatna hi Mizorama Congress party hruaitute chuan chonaah kan ngai a, kan phûr tulh tulh a ni," a ti.

Congress party chu committee kaltlanga inkaihruai ṭhin an nih thu sawiin Lalsawta chuan, "Committee-in hun rei lo têah bial vil tur leh ding tur pawh a siam mai ang. Kum 2023 Mizoram Assembly inthlan kan hmachhawn turah hian tuna MLA panga kan neih sate'n an bial vil se, anni bak mi dang tan bial vil bik neih a rem lo," a ti a, mimala bial vilin sum hmanga campaign a hring ṭhin tih a sawi.

Lalsawta chuan, sum hmatheha campaign-in a hnuah mipui chan ái mimal sum siamna a hring ṭhin tih sawiin, "Hetiang a thlen lohna tura mipuiin an pawm, mipui tana thawk tur mi rintlak pek hi Congress party chuan a tum a ni. MLA ding sate bial vil bak bial 35 hi chu party mipuiin hneh takin kan vil mai dawn a ni," a ti.

MPCC President chuan, sorkar ṭha mamawh em em Mizoram mipui, mi retheite leh ṭhalaite dinhmun siam leh khai chhuah chu an kutah a awm thu sawiin, "Mizoram mipui mamawh chu sum ni loin sorkar ṭha leh rintlak a ni. Sorkar ṭha pe tur hian Congress party hi mawhphurtu kan ni. Ṭhat loh theih lohna báwm hi sual theih lohna báwm a ni lo, ṭhat loh theih lohna chu system dik hi a ni," a ti.

'Ṭhat loh theih lohna báwm' tih lehkhabu tichhuaktu Lalrindika Ralte, MLA pawhin thu sawiin, "Ṭhat loh theih lohna báwm lehkhabu hian ram leh hnam tana inpe turin min phût a, party ang pawha ram leh hnam tana inpe turin min phût a ni," a ti a; Congress party an nih avangin an kalna leh chêt velna hrang hrangah a ṭha thei ang bera awm leh hmalak an bá tih a sawi bawk.