Lungleiah Green-Ag Project sawiho

Nimin khan Lunglei DC conference hall-ah 3rd Technical Support Group (TSG) virtual mee­ting neih a ni a, Lunglei DC Kulothungan A-in kaihruaiin, Lunglei leh Mamit district-a United Nations Food and Agricul­ture Organization (FAO) hnuaia Green-Ag: Green Landscape Imple­mentation Unit (GLIU) hmalakna leh hma­chhawpte sawihona a ni.

Kulothungan A chuan, GLIU chu hmasawnna huap zau leh daih rei neih theihna tura duan a nih thu a sawi a, "He project kaltlang hian ramngaw leh nungchate humhalh chungin line department hmalaknate kalpui a ni ang," a ti.

Ṭhutkhawmah hian Annual Work Plan & Budget 2022-23 te, Mamit leh Lunglei district-a hmalakna ngaih pawi­mawh hmasak turte leh kumin first quarter (April-June) inkara hmalakna turte pawm a ni. Mamit leh Lunglei district-a hmalakna hmasa atana ruahman hian khaw 17 a huam a, Mamit district-ah khaw 13 leh Lunglei district-ah khaw pali a ni.

Green-Ag hnuaia hmalakna turah hian Mizo buhban, hmarchatê, chhàwhchhi, vaimim leh vawk vulhte thlan a ni a; thlai chìn leh ran vulhte chu zir chian a, kut hnathawktute mamawh ngaihtuahpui bakah, state páwn thlenga mumal zawka hralh dan ruahman­­na siam a ni ang. Village Implementation Commi­ttee din a ni tawh bawk.

Green-Ag Project hi April 1, 2019 aṭanga March 31, 2026 chhung atana ruahman a ni a, project kalpui nan Madhya Pradesh, Mizoram, Odisha, Rajasthan leh Uttarakhand state-te tan budget US dollar 3,35,58,716 ruahman a ni.