SEDP trade tur tihfel a la ni lo ; Sorkar kum tharah sem a ni dawn

18th March, 2022

SEDP Executive Board vice chairman H Rammawi, Planning Board vice chairman ni bawk chuan, Socio Economic Development Programme (SEDP) trade tur tihfel a la nih loh thu sawiin, "Sorkar kum tharah sem ṭan a ni dawn a, budget-ah pawh dah a ni," a ti.

Vanglaini palai zawhna chhangin H Rammawi chuan, sorkar kum thar aṭangin SEDP kalpui ṭan a nih dawn avangin lo vah ngai trade-te chu an puanzar nghal thu a sawi a, "Lo vah ngai kher lo trade dang eng emaw zat a awm dawn a, chu'ngte chu tihfel a la ni lo," a ti a, SEDP hnuaiah trade chi hrang eng emaw zat a awm dawn thu a sawi.

H Rammawi chuan, SEDP hnuaiah first instalment atan Rs 50,000 sem a nih dawn thu sawiin, "Trade azirin Rs 50,000 aia tam pek ngaite pawh an awm ang. A ṭum khatnaah chhungkaw 60,000 vel tuam tum ni mah se, a zat tur tak tihfel a la ni lo," a ti.

SEDP Executive Board Vice Chairman chuan, DC-te kaihhruai tur district SEDP committee an la din loh thu sawiin, "Kan la din thei lo deuh a, din thuai a ni ang," a ti a; District SEDP Committee-te'n village SEDP committee an din leh tur thu a sawi.

Village SEDP committee-te chu SEDP dawngtu thlangtu tur an nih thu sawiin H Rammawi chuan, "Kan hotute'n grassroot level committee-in thlang se ṭha an ti. Mahse, anni thlan hi final a ni nghal ngawt dawn lo a, committee leh board-ah a thlirho leh ang. Thutlukna chu Chief Minister kaihhruai SEDP Governing Board-in a siam ang," a ti.

SEDP hnuaiah hian board pahnih - CM kaihhruai SEDP Governing Board leh Deputy Chief Minister kaihhruai SEDP Executive Board a awm a; committee pahnih - DC-te kaihhruai district SEDP committee leh village SEDP committee-te a awm dawn bawk.

SEDP chungchangah hian chief minister Zoramthanga chuan, SEDP bul ṭanna atan chhungkaw 60,000 aia tlem lo hnenah Rs 50,000 zel sem phawt an tum thu a lo sawi tawh a, "Pawisa awm dan azirin chhungkaw 60,000 aia tam pawh kan pe thei mai thei. Chhungkaw 60,000 hnena sem tur hi chu pawisa kan neih sa a ni a, kan sem chhunzawm zel ang," tiin a lo sawi tawh a ni.