Larsapin Padmi Shri VL Nghaka a lawmpui

Governor Hari Babu Kambhampati chuan Padma Shri 2022 dawng tura thlan VL Nghaka, Ramhlun South chu nimin khan Raj Bhavan-ah léngah sáwmin, lawmpuina a hlan.

Larsap chuan, ṭawng thiam tam a ṭul thu sawiin, "Mi dangte nena kan inlaichìnna leh inpawh nan ṭawng a pawimawh. Hindi leh English bakah, kan chhehvela chengte ṭawng leh mahni ṭawng thiam kan tum a ngai. Kum 1954 daih aṭang tawha Hindi zirtirnaah Mizoramah bul a lo ṭan tawh tih ka hriatin Pu VL Nghaka hi ka ngaisang hle," a ti.

VL Nghaka h/o Lalbiakveli (L) hi kum 1930-ah a piang a, kum 1954-ah Hindi Visharad zoin, Mizo zingah a hmasa ber a ni. Kum 1976-ah MA leh kum 1980-ah M.Ed. a zo leh bawk. School Education department-ah hun rei tak mawhphurhna pawimawh tak tak a chelh hnuah DIET, Aizawl principal hna a thawh laiin kum 1991-ah pension-in sorkar hna a chawlhsan.

Mizorama Hindi zirna leh tihhmasawnna lama a thawh ṭhat avangin literature and education huangah Padma Shri 2022 dawng turin VL Nghaka hi thlan a ni a; March 28, 2022 khian Rashtrapati Bhavan-ah President hnen aṭangin a dawng dawn a ni.