Hlawk zawk leh ṭhahnem zawkin buh leh thlai thar kalpui tum a ni - Agriculture Minister

Agriculture minister C Lalrinsanga chuan nimin khan Kolasib Pangbalkawna OM OM Modern Rice Mill a hawng a, buh leh thlaite hlâwk zawk leh tam zawk thar a nih theih nan ruahmanna kalpui tum a nih thu a sawi.

Agriculture Minister chuan, dan mumal tak hnuaiah a huhoin loneitu intél khawm (farmer's producer organi­zation) kaltlangin hlâwk zawk leh tam zawka buh leh thlai thar kalpui tum a nih thu sawiin, "Tunlai thiamna hman ṭangkai zel tum a ni. Buh chi ṭha RCM-10 pawh hlawhtling taka enchhin a ni tawh," a ti.

Hnianghnâr taka thlai thar dan tur an ngaihtuah thu sawiin C Lalrinsanga chuan, "Irrigation & Water Resources department kaltlangin hmun eng emaw zatah solar water pump bun tum a ni," a ti a, solar water pump-in thlaia intodelhna turah thlai chíngtute nasa taka a puih a rin thu a sawi.

Agriculture Minister chuan, Kolasib district-a leilet leh huan awmte chu ram páwn mi ni lo, ram neitu dik takte'n ṭangkai taka an hman a, a hlâwkna pawh ram neitute ngeiin an tèl theih nan Agriculture department-in hma a lak zel thu a sawi bawk.

Supply minister K Lalrinliana pawhin thu sawiin, buh chìnna hmun ṭha awm ang angte ṭangkai taka hman a ṭul thu a sawi a, "Om Om Modern Rice Mill hlawhtlinna chu loneitute leh kut hnathawk­tute kutah thui tak a innghat," a ti.

Technical report-a a lan danin, kum 2016-17 khan Mizoram sorkar hmalakna NEDP kaltlangin Modern Rice Mill bunna turin cheng nuai 80 pek a ni a, SEDP hnuaiah transformer bun nan cheng nuai 33.61 pek leh a ni. Heng bakah hian, Mizoram Rural Bank aṭangin loan cheng nuai 445 lak a ni a, a neitute'n anmahni sum nuai 132 an séng tawh bawk.

Om Om Modern Rice Mill hi darkar khatah ton 5 her thei tura ngaih a ni.