SBI-in thisen pekna bungrua an hlân

State Bank of India (SBI) chuan corporate social responsibility aṭangin nimin khan Association for Voluntary Blood Donation (AVBD) hnenah thisen peknaa hman tur hmanrua leh bungrua chi hrang hrang, Rs 2,51,000 hù an pe.

Bungrua inhlanna inkhawm hi Civil Hospi­tal, Aizawl Medical Superintendent pisa kawtah neih a ni a, Health and Family Welfare Board vice chairman Dr ZR Thiamsanga'n a hman­pui. Hmanruate chu SBI regional manager LP Lalchangkima'n AVBD president C Lalnunnema hnenah a hlân a ni.

Dr ZR Thiamsanga chuan, Mizoram sorkarin thisen pek a ngai pawimawh tih sawiin, "A theih ang angin blood bank staff indaih lohna thuam chak zel a ni a, a ṭul apiangah hmalak zel a ni ang," a ti.

AVBD hmalakna leh inpekna chu ropui a tih thu sawiin ZR Thiamsanga chuan, "Mizoramin Covid-19 vanga hun harsa tak a tawh laiin thisen pe turte kan tlâkchham laiin rim tak leh taima takin an thawk a, nunna tam tak an chhanhim a, an thawhrimna avangin sorkar pawh a mualpho lo a ni," a ti a; sorkar aiawhin lawmthu a sawi a ni.

LP Lalchangkima chuan, an theih ang angin Covid-19 dona atan bungrua an pe ṭhin tih sawiin, "Tunah pawh hian kan la kalpui zel a, ICU khum pawh 50 kan chah a, a rawn thleng tawh," a ti.

SBI-in AVBD hnena an pekte chu - digital Blood pressure monitor 15, inbûkna (weighing scale) 10, mattress 30, lukham 30, bedsheet leh lukham káwr 30 ve ve, plastic chair 20 leh steel almirah pakhat a ni.

SBI hian CSR aṭangin damdawi-in leh pawl hrang hrang hnenah Covid-19 dona atan ventilator 15, ambulance, morque van, oxygen concentrator leh PPE ṭhahnem tak an lo pe tawh bawk.