TB ûmbo beihpui thlâk a ni

India rama ngawr (tuberculosis) natna ûm bo beihpui thlâkna kalpui mek pualin Serchhip leh Mamitah nimin khan hun hman a ni.

Sechhipah chuan TB Centre-ah campaign bul ṭan a ni a; Serchhip chief medical officer Dr Lalzawmi chuan, World Health Organisation-in khawvelah TB ûm bo a tumna kal zelah kum 2025-ah India ram aṭangin TB ûm bo tum a nih thu a sawi a, "Hma­lakna kal zelah Aashwa­san Campaign neih a ni. Sorkar laipui chuan India rama tribal area district 100-ah nasa taka ṭan lain, district 100 zingah hian Serchhip district pawh a tel a ni," a ti.

Dr Lalzawmi chuan, ngawr natna chu a lang chhuak mai lo tih sawiin, "Lo vei ru reng awm theih a nih avangin TB veite zawn chhuahna tura hmalak a ṭul hle," a ti a, TB vei zawn chhuah chak a nih chuan ûm bonaa hmalakna a chak dawn thu a sawi.

Inkhawma tarlan danin, kum 2021 chhung khan Serchhip district-ah TB vei mi 66 hmuh chhuah a ni a, chu'ng zinga 45 chu chuap TB niin, mi 21 chu chuap páwn lama TB an ni. TB vangin mi pali an thi.

Mamitah chuan kum 2025 hmaa India ram aṭanga ngawr ûm bo beihpui thlakna kal mekah House to House Survey Launch Event of Aashwasan Campaign buatsaih a ni a, CMO Dr Zothankhuma Chhak­chhuakin a pisa kawt aṭangin a vailiam.

Dr Zothankhuma chuan, TB um bo chu Prime Minister-in a ngaih pawimawh avangin hma­lakna chak taka kalpui a nih thu sawiin, "Kan chhungah thawktute ṭhahnemngaihna leh hmalakna avangin TB hrik hmuh chhuah a tlem zel a ni," a ti a; Mizoramah TB awm lohna district hmasa ber ni tura ṭan la turin thawktute a chah.

Piramal Swasthya Team-te hian Mamit district-ah thawktu pasarih neiin, Reiek, West Phaileng leh Zawlnuam RD block-ahte ṭhen a ni a; RD block chhungah hian ni 100 chhungin House to House Survey neih a ni dawn a, TB vei nia inrinhlelhna neite chu enfiah nghal zel an ni ang.