KHAWTHLIR

Thisen pe
KṬP, ITI Veng Bial chuan nimin khan Civil Hospital, Aizawl tan thisen unit 51 an pe a, petute mipa 41 leh hmeichhia 10 an ni. Kolasib College NSS pawhin Kolasib District Hospital tan thisen unit 39 an pe a, petute mipa 28 leh hmeichhia 11an ni.

Lawmman sem
Women & Child Development department hnuaia Anganwadi Workers Training Centre chuan thawnthu sawia intihsiak 'Story Telling Competition' an buatsaiha lawmmante nimin khan an sem a, Social Welfare secretary Sangchhin Chinzah-in a hmanpui. Intihsiak hi anganwadi worker-te tana buatsaih a ni a, pakhatnain Rs 5,000, pahnihnain Rs 3,000 leh pathumnain Rs 2,000 an dawng a ni.

Fetal doppler pe
AMC ward XVIII councillor Malsawmzuala Ralte chuan nimin khan a bial chhunga Model Veng leh Damvenga health sub-centre-te a tlawh a, nu pum chhunga naute lung enna khawl, fetal doppler a pe.

Awareness buatsaih
Directorate of Social Welfare & Tribal Affairs leh Directorate of Women and Child Development chuan nimin khan Azadi Ka Amrit Mahotsav leh International Women’s Day pualin National Social Assistance Programme (NSAP) hnuaia hmeichhia hamṭhatna hmute tan Aijal Club-ah awareness programme an buatsaih. NSAP hnuaiah hian hmeichhiate hamṭhatna tur sub-scheme panga a awm a ni.

Vaccine dose 14,97,113 pe tawh
March 16, Nilaini thleng khan Mizoramah mi 8,10,709 hnenah Covid-19 vaccine dose 14,97,113 pek a ni tawh. Covid vaccine la tawh mi 8,10,709 zinga mi 6,61,152-in dose hnihna an la tawh a, precautionary dose la tawh mi 25,252 an awm. March 16 bikah dose 1,320 pek a ni a, dose khatna 276, dose hnihna 972 leh precaution dose 72 a ni.

BBBP inhrilhhria
Beti Bachao Beti Padhao (BBBP) Implementation Unit, Serchhip chuan nimin khan DC Conference Hall-ah self help group member-te tan BBBP chungchang inhrilhfiahna hun an buatsaih. He hunah hian BBBP hmalakna chu sorkar laipui flagship programme a nih thu leh hmeichhe naupangte venhim leh zir puitlintir chu a tum ber a nih thu tarlan a ni.

Heroin man
Dungtlang Police Station-a duty-te chuan March 16, Nilaini zan khan VL Ruatkima (39) s/o F Lalsangliana leh Lallianmawia (28) s/o Dothanga, Tlangsam nia inchhálte hnen aṭangin heroin gram 156 man. Heroin hi tualchhunga hralhna ang chuan Rs 6,50,000 man a ni.

Faina hnatlang
India ram pum huapa khawpui fai inelna, Swachh Survekshan 2022 kalpui mek pualin nimin khan Champhaia UDPA department-a thawkte chuan faina hnatlang an nei a, Champhai aṭanga Aizawl panna kawngpui leh Khankawn World Bank road kawngpui kama bawhhlawhte chhar khawmin an tifai a ni.