Laltlanzova Khiangte Road hawng

Aizawl Municipal Corporation (AMC) executive councillor Laltlanzova Khiangte chuan a bial, ward-IV chhung Ramhlun South-a lirthei luh theihna kawng siam thar, a hmingchawia phuah, Laltlanzova Khiangte Road chu nimin khan a hawng.

Kawng hi ft. 285-a thui niin, a siam nan cheng nuai 20.4 ruahman a ni a, October 2020 khan siam ṭan niin, December 2021 khan siam zawh a ni. Lirthei la thlen ngai lohnaa kawng siam a nih theih nan hian mi 10-in ram an pe a ni.

Laltlanzova Khiangte chuan, a biala veng hrang hrangte chu a hmunhma a rem loh avangin inkalpawhna ṭha an mamawh zual bik tih sawiin, “Tun ṭum kan term-ah hian inkalpawhna ṭha siam tam hi kan tum ber pakhat a ni,” a ti a; AMC aṭangin ṭum khatah sum tam tham tak pek theih a nih loh avangin a chhawp tê têa tih a ngaih thu a sawi.