Dy CM hoin nurse zir zote thlah

Mission Foundation Movement hnuaia MFM School of Nursing (ANM) chuan nimin khan Durtlanga an hmunah Auxiliary Nursing Midwifery (ANM) zir zote thlahna, Capping and Lamp Lighting Ceremony vawi 13-na an buatsaih a, deputy chief minister Tawnluia'n a hmanpui.

Dy Chief Minister chuan, MFM-in Pathian rawngbawlna atana remchang tak nursing school an dinin kum 13 hmél a hmu ta chu a lawmpui thu sawiin, "MFM hmalakna avangin mi tam takin eizawnna an neih phah a, Mizo ṭhalaite tana an hnathawh hi a ropui tak zet," a ti.

Covid-19 avanga harsatna a thlen laia pawimawh berte zinga mi chu hriselna lama thawktute an nih thu sawiin Tawnluia chuan, "Ram hmasawnna atana pawimawh ber chu mihring hriselna hi a ni," a ti a; doctor, nurse, health worker leh hriselna lama thawktute thawhrimna avangin hripui do hneh theih a nih thu a sawi.

Inkhawmah hian nurse (ANM) zir chhuak thar mi 20 hnenah Mizoram College of Nursing principal Lalchhanhimi'n lukhum a khumtir a; Mizoram Nursing Council hnuaia exam beitu zingah top 10-a lang mi pathum hnenah Thanpari Award hlan a ni.