SEDP hi dinchhuahpui ngei turin Mipuite kan beisei - Lalruatkima

Minister of state Lalruatkima chuan nimin khan Dinthar YMA Hall-ah puanṭhui khawl a sem a; Socio Economic Development Programme (SEDP) chu din chhuahpuia hmasawnpui turin mipui an beisei thu a sawi.

Lalruatkima chuan, chak takin SEDP buaipui mek a nih thu sawiin, SEDP-ah theihna, thiamna leh tuina záwng thlang turin mipui a chah a, “SEDP hi dinchhuahpui a, hmasawnpui turin mipui kan beisei a, a thlàwna dawngah inngai lo turin kan chah a ni,” a ti.

Sorkar chu mipui siam a ni tih sawiin Lalruatkima chuan, “Sorkarin Zoram hmasawn nan a theih tâwk a chhuah mek zel a ni,” a ti a; a bial mipuite chu amah ṭawiawma finchhuah tur leh ṭawngṭaipui turin a chah. Sorkar hmasaa zu zawrh vanga mipui rûmna a reh tawh nia sawiin, “Pathianin he sorkar hi min pe a, hmasawnna nasa tak kan hmu mek zel a ni,” a ti bawk.

Aizawl West-II bialtu MLA hian MLA fund hmanga lei puanṭhui khawl 103 a leite chu a bial mipui hnenah a sem a ni.