Khawvel hrisel leh ṭha siam atana UNO hnuaia hmachhawpte zirho a ni

Planning & Programme Implementation department chuan nimin khan Champhai leh Kolasib-ah United Nations hnuaia ram hrang hrangte'n kum 2015 aṭanga 2030 chhunga hmachhawp an siam, Sustainable Development Goals (SDGs) zirhona an buatsaih.

Champhaiah chuan SDGs zirhona hi Champhai Vengthlang YMA Hall-ah sorkar department, village council member-te leh tlawmngai pawl hruaitute tan buatsaih a ni a, Champhai DC mawhphurhna latu Henry C Lalrawnkima'n a hmanpui.

Henry C Lalrawnkima chuan, SDGs chu hmasawnna ngêlnghet, kumhlun leh intungnung thei nei tura ṭan lakna a nih thu sawiin, "SDGs kaltlanga tihhlawhtlin tum hrang hrangte chu awmhmun, ram leh mihring chêngte azir zela her rem a duhawm. Hmanraw neih leh mamawhte a inchen vek loh avangin kan dinhmun ṭheuhte thlir chunga ngaihtuahna zau tak sên a ṭul a ni," a ti.

Planning under secretary Issac Lalmuanpuia Chuaungo chuan, SDGs awmzia leh tehfung hrang hrangte a sawifiah a, research officer Lalfakzuala'n SDGs pawimawhna leh tihhlawhtlin a nih theihna tura hmalak ṭulte a sawi bawk.

Kolasib-ah chuan SDGs zirhona hi IPR conference hall-ah buatsaih a ni a, Planning consultant Dr Vanlalzawna'n kal khawmte chu SDGs pawimawhna leh nihphung a hrilhfiah.

Zirhonaa tarlan danin, SDGs tehfung hrang hrang hmanga endiknaah Mizoram chu India ram pumah 12-na a ni mek a, ‘Most Improving State’ a nih bakah, hmarchhak state-a district 103 zingah Serchhip district chu pangana a ni mek. Mizoram district zingah Kolasib chu 3-na a ni mek bawk.